KOHNA HRIATCHIANNA HMANGA RILRU HAHNA CHHAWK ZANGKHAI

_Isua Tih Danin_

-Rick Warren

-Nov 11, 2025

“Ka lo chhuahna leh ka kalna tur chin pawh ka hria e.” Johana 8:14 

Tunlai khawvel hi mi tam tak tan chuan phurrit a ni a. Nimahsela tunlaia buaina hi hmanlai lehkhabuah a chinfelna a awm tlat a nih chu. Bible keu la Isua chanchin zir ang che. Harsatna hrang hrang a hmachhawn nasa lutuk, nimahsela dam takin a chingfel thei a ni. Achhan chu kohna a dawnah a chiang a, chutiang tak chuan a nun a hmang a ni.

  

Isuan hetiang hian a ti, “Ka lo chhuahna leh ka kalna tur chin pawh ka hria e.” Johana 8:14 

Eng nge i dinhmun ni ve le? Pathianin eng ti turin nge a koh che? Engang mi pawh ni la, Pathianin a ko tlat che a ni. He leiah hian tihtur a pe che a, chu hna chu thawk thei turin a buatsaih mek che a. Pathian chuan theihna hrang hrang a pe che a ni.  

Pathian chuan khawvel thil leh i chhehvela awm thil te hian a nawrkal che a duh lo a ni. Chhan neia nung turin leh kohna i dawn anga nung turin a duh che a.  Tirhkoh Paula chuan, “A kohna che u phua awm turin, kei, Lalpaa mi tang hian ka ngen a che u.” Ephesi 4:1

Kohna i dawn chu i hriatchian hnuah chuan, chutah chuan i rilru pe la - chu thil chu a pawimawh ber a ni tih hria ang che.

Thil tha ber ni lo vin, thil tha ve tho thil dang hmanga intihbuai hi a awl em em a ni. Isua awmze neia nun hmannaah chuan nun thiltihtheihna a awm tih a hria a. Bible chuan, “Amah hruai chhoh a hun dawnin, Jerusalem khuaa kal tumin a hawi tlat a.” Luka 9:51

Paula chuan heti hian a sawi, “Thil pakhat ka ti thin …” Phillipi 3:13. Thil 40 ka ti thin a ti lo va. “Thil pakhat ka ti thin,” a ti zawk a. Chu chu awmze neia nun hman dan chu a  ni.

Isua leh Paula khan hei hi an man hle a: Eng de riai riai chuan thiltiheihna a nei tlem a, eng na tak chuan thiltihtheihna a nei tam a ni tih hi. Eng chak vak lo chuan lehkha a ti alh thei a, eng na tak chuan thir pawh a tan bung thei a ni.

Vawiinah hian rilru hah taka i awm a nih chuan, i nun chu awmzenei lo vin i lo hmang pawh a ni maithei a ni. Kohna i dawn chu ngaihtuah chiang la i nun chu kohna hmang chuan chhungkhat rawh le. I harsatna te chu a lo kiang ang a, nun tam ilo nei tawh zawk dawn a ni. 

Ngaihtuah zui atan

* Isuan eng ti turin nge a koh che? Damchhung atana kohna nge hun reilote atana kohna zawk? 

* Kohna i dawnah chuan ila chiang lo deuh em? I theihna leh thiamna zawng zawngte kha han ziak chhuak teh le.

* Tunkar chhung a kohna i dawn hmanga i ngaihtuah tur thil pakhat eng nge ni le?

*[Lettu: Sangpuia]*