Aizawl | Nov 8, 2025: ZPM President Lalliansawta chuan vawiin khan Aizawl Press Club-ah thu thar thehdarhtute kawmin, "Kan sawrkar kum hnih kan hman mek chhunga ka lawmna ber chu - Eirukna (corruption) lakah kan Minister leh MLA zingah hminghliau pakhat mah an awm lo hi a ni," a ti.
PRESS STATEMENT OF LALLIANSAWTA, PRESIDENT ZPM
(Dated 8th November, 2025 @Aizawl Press Club)
1. Vanduaithlaktakin, Dampa bialtu MLA duhawm tak Pu Lalrintluanga Sailo chuan hun lo takah min boralsan a, loh theih lohna avangin Dampa bialah inthlan thatna (by-election) neih a lo tul ta a. Party hrang hrangin theihtawp chhuahin kan campaign a. Tunah a hmawr kan bawk dawn hnai ta a. Kar lo awm tur thawhlehni 11.11.2025 mai hi vote thlak hun tur a lo ni ta reng mai a. Dampa bial mipuite hnena ka ngen duh chu – ZPM Candidate Pu Vanlalsailova lo vote theuh turin ka ngen che u a ni.
2. He inthlan tur atan hian party tin te kan tang em em a, keini ZPM Party pawhin theihtawp kan chhuah a, kan campaign danah mimal leh pawl hrang hrang leh party dang te rilru tina zawng emaw mit timim zawng emaw pawhin kan hriat loh hlanin kan lo awm mai thei a. Chutiangte a lo awm a nih chuan an hriatthiamna kan dil tak meuh a ni.
3. Pathian leh Mizoram mipuite duhsakna changin kum 2023 General Election-ah sawrkarna kan siam a. Tunah hian kan sawrkar hian kum hnih a lo tling ve dawn ta reng mai a. December thlaah kum hnih a tling dawn a. Kum 2 kan sawrkar chhung hian theihtawp kan chhuah a, Mizoram leh Mizo mipuite tan pawh thil tha tam tak kan ti tawh a, kan ti mek zel bawk a. Hetih rual hian mipui duhkhawp kan tlin lohna lai te pawh a awm tih kan hria a. Tun term hmang zo tur hian kum 3 hun kan la nei a. Mizoram leh Mizo mipuite tan ZPM hian theihtawp kan chhuah zel dawn a ni.
4. Kan sawrkar kum hnih chhunga kan thil tha tih hrang hrangte hi tunah hian sawi lan vek sen a ni lova. Kan sawrkar hlawhtlinna (achievement) dahkhawmna lehkhabu ‘Booklet’ siam turin kan inbuatsaih mek a. Hun rei loteah kan tlangzarh theih kan beisei a. Chutah chuan chiang zawkin a chuang dawn a ni. Kan sawrkar kum hnih kan hman mek chhunga ka lawmna ber chu - Eirukna (corruption) lakah kan Minister leh MLA zingah hminghliau pakhat mah an awm lo hi a ni. Kan tum ang ngeiin eiruk awm lohna, langtlang sawrkar kan siam mekin ka hria a, lawmawm ka ti takzet a ni.
5. He sawrkar hian Pathian lam a hawi reng theih nan leh Pathian duh dana he ram kan kaihhruai zel theih nan tawngtaipui kan mamawh takzet a. Kohhran leh mimal thahnemngai ten min tawngtaisak thinna bansan lo a, nasa leh zuala min tawngtaipui zel turin ka ngen tak meuh che u a ni.
Ka lawm e.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: