India rama Sawrkar damdawi in ṭha tehnaah PHC pakhat leh UPHC pakhat tling thar

Aizawl | Nov 3, 2025: India rama sawrkar damdawi In ṭha bik tehnaah Primary Health Centre pakhat – Marpara PHC, Mamit District leh Zemabawk UPHC, Aizawl East District te an tling thar a, heti hian Mizoram chhunga HWC-PHC 57 target awm zinga 40 leh HWC-UPHC 9 target awm zinga 6-in National NQAS certificate an nei tawh a ni.

National Health Mission (Mizoram) Mission Director Dr Lily Chhakchhuak hnen aṭanga thu kan dawn danin, India rama sawrkar damdawi In ṭha bik tehna, National Quality Assurance Standards (NQAS)-a tling thar Marpara PHC leh Zemabwk UPHC te hian a tehnaah 91.97% leh 95.98% te an hmu a ni.

Heti hian Mizoram chhunga Sawrkar damdawi in 54 te chu NQAS National Certificate nei tawh an ni a. Tunah hian sawrkar damdawi in 16 leh HWC Sub-Centre 23-in state level certificate nei tawhin national-level assessment an dil mek a ni.

Hemi bakah hian Champhai District Hospital chuan nau neihna hmun ṭha bik tehna, LaQshya leh naupang enkawlna hmun ṭha bik tehna, MusQan certificate a hmu thar bawk a. LaQshya bikah hian 93.96% hmuin Platinum Badge an dawng a, MusQan-ah hian 96.57% an hmu bawk a ni.

National Quality Assurance Standards (NQAS) certified damdawi in te hi endikna chhawng thum paltlang an ni a, a tawp bera endikna an hmachhawn hi National External Assessment a ni a, state pawn aṭangin Assessor (endiktu) an lo kal ṭhin a ni. Hetah hian a tehnaa 70% an hmuh tlin chuan certified an ni chauh ṭhin. Heng certified tawh damdawi inah te hian natna darh thei ven kawngah te, thawktu zawng zawngte an hna bil an thiamna te, an level zelah enkawlna an pek ṭhat dan te, a thlawna enkawlna leh damdawi pek te, damdawi in faina leh dik taka damdawi in bawlhhlawh sawngbawl te, hawihawmna leh a chhehvel vawnfai kawngah te, environment vawn ṭhat kawngah te endik an ni.

NHM Mission Director Dr Lily Chhakchhuak chuan India rama damdawi in ṭha tehna a tling thei tura thawktu State Quality Assurance Unit te, District Quality Assurance Unit, Champhai, Mamit leh Aizawl East District-a Chief Medical Officer (CMO) leh Staff zawng zawng te, leh Champhai District Hospital DMS Dr Zatluanga, Marpara Primary Health Centre (PHC) Medical Officer Dr C Lalrinmawia leh Zemabawk Urban Primary Health Centre (UPHC) Medical Officer Dr F Vanlalchhuanpuia leh health staff-te thawhrimna chu fakawm a tiin lawmthu a sawi a. Heng NQAS certified sawrkar damdawi in kan neih tak te hi mipuite’n ṭangkai taka an hman a duhsak a, mipuite pawhin ṭangkai taka hmang turin a chah bawk.