ZPM sorkarna hnuaiah dan kalha sumdawngte an tawmim avangin MNF leh MPCC hun lai aiin sum leng vak a tlem niin ZPM Thalaiin an sawi!

Aizawl | Oct 10, 2025: ZPM Thalai chuan thuchhuah siamin, ZPM sorkarna hnuaiah dan kalha sumdawngte an tawmim avangin MNF leh MPCC hun lai aiin sum leng vak a tlem tih an tarlang, sum lengvak tlem ta chu sorkar hmalakna vang niin an sawi a. "dik taka thawkrimte kutah chiah Mizoram budget sum hi hman a nih tawh avangin, sawrkar hmasate hunlai ai chuan ZPM Sawrkarna hnuaiah chuan sum leng vak pawh a tlem ta ni," an ti bawk.

ZPM Thalai chuan, 'Bana Kaih Policy' hmanga thlaithar leinate pawh sum fai ni lo, direct beneficiary transfer hmanga bank AC a thun vek a nih avangin kum dang aiin thingtlang lamah pawh sum leng vak a tlem tih tarlangin ZPM Thalai chuan, 'Opposition party-ten 'ZPM Sawrkarna hnuaiah sum leng vang a tlem' tia min beihna sawrkar a kal dik vangah kan ngai,' an ti.

ZPM Thalaiin sum lengvak tlem chhana an tarlante:

1. Smuggling nasa takin a tla hniam: ZPM chuan a intiam ang ngeiin sawrkarna a chelh veleh Myanmar atanga dan loa sumdawnna, a bikin kuhva leh ruihtheihthilah hma a la nghal. MNF Sawrkar angin heng sumdawnnaah hian ZPM Sawrkar chuan 'mit a siai' ve loa, dan phal loh tawlh ruk chingte an tawmim hle tawh a ni. Hetiang a nih avang hian Mizoramah sum leng vak a tam a, heng smuggler-te hian an inthupna atan building, ram leh dawrte pawh man sang tak takin an lei chhawng thin a, smuggling tive lote tan inhmun lei ngam pawh a ni lo hial hman a ni.

2. Sawrkar sem policy: ZPM a sawrkar hma khan MNF Party chuan SEDP Rs.300,000 sem intiamin an sawrkar phah hial a ni a, 2018-2023 ah khan SEDP atan MNF Sawrkar khan cheng vbc. 1193.75 a hmang ral. Congress pawhin NLUP Rs.100,000 sem an intiam avang khan 2008 -2018 ah Congress Sawrkar pawhin NLUP atan cheng 2896.91 crore lai a hmang ral bawk a ni. Hetiang a nih avang hian Mizoramah a thlawna pawisa dawng an tam hle a, khawtualah sum leng vak pawh a tam phah a ni.

ZPM Party erawh hetianga Mizoram Budget sum sem ral dotu a nih avangin, Sawrkarna kan chan phat atang khan MNF in SEDP sum an sem bang cheng nuai 110 chu hah taka kut hnathawktute thlai thar lei sak nan a dah hrang nghal a, dik taka thawkrimte kutah chiah Mizoram budget sum hi hman a nih tawh avangin, sawrkar hmasate hunlai ai chuan ZPM Sawrkarna hnuaiah chuan sum leng vak pawh a tlem ta ni.

3. Digital India Policy: Central Sawrkar chuan Digital India a kalpui avangin sum fai hmang thin kan tlahniam ta hle a, kawng sira hawkers leh chawhmeh zuarte chenin Digital Payment System kan hmang vek tawh a ni. Dawr leh bazar kal nana hun tam tak kan sen thinna pawh tlahniam zelin, online marketing leh home delivery policy kan uar chho zel a, heng sumdawnnaah hian online banking kan hman nasat avangin sum fai hmanna a tla hniam hle bawk a ni.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]