- James Ramdinmawia
Kha pa kha kan țhianpa, Marema a ni a, Tuisual Group YMA President a ni. Hrangbana College-ah SU Leader ka nih ve laiin ani hi Govt. Aizawl College-ah SU Leader a ni a, kum 20 kal ta-ah khan. Students' Self-Support Union (SSU) leh MZP-ah te kan inhmang ho zak zak a. MZU kan luh vè laiin ka Batchmate a ni bawk.
Țumkhat chu Marema hian MZP Gen. Hqrs. Inthlanah Asst. General Secretary Post a chuh ve a. Kan campaign-pui lai takin kan țhianpa Khabea Hruaia Chhangte hian Lunglei lam ațangin min rawn call a. "Marema te chu MZP Gen. Hqrs. OB meuh atan chuan a va iaiawm àwm ve. Sakawrdai Millionaire fapa, sawhthing hmun rochung tur kha a ni ve mai a," a ti ta pek a. Kan nui nasa hle. Anni hi MA kan zir laia Mizo Department-a Class khata țhu, inngamtlak tak an ni.
MZU Annual Magazine "Lunglohtui 2006-2007"-ah khan Vanhmunmawia Hnamte nge Hruai Khabea hi ka chiang ta lo, Mizo Department-in Study Tour neia Delhi leh Mumbai an fan thu ngaihnawm takin a ziak a. Guwahati an pelh hnu, rel-a an chuan laia kuhva lei khawl nachâng hre lo, kuhva châk an inpelh suau suau laia a fing fâl, kuhva lei khawl nachâng hria Marema chungchang heti hian a ziak alawm. "Marema kha kuhva kan dil luih luih a, tumah a pe phal der si lo. Intithei tâwkin midang hmuh tur ngeiin kuhva a'n tep chuap chuap kha chu amah kha meihawl Istiri hàwn ang huau mai hi a nia," tiin. A va inhmeh tak...
Vawikhat chu nula an rim a ni àwm e. An nula rim chuan lehkha a lo zir a. Marema hian, "Mami, eng nge i zir?" tiin a zawt a. Nula chuan MA (History) a zir mek thu a lo hrilh a. Chutah Marema chuan, "Miin 'an idea can change the world' kan tih laiin nangni chuan 'Akbar was, Akbar was' in lo la ti lauh lauh a ni maw?" a ti ta mai a. A bem thlu lo chiang teh asin!
Facebook Inbox / Messenger-a min rawn biakna te hi a ho thei a nia. "Mutual Friend i va ngah bîk ve," tih te, "I Mutual Friend leh ka Mutual Friend insualtir ang," tih mai mai te a ni.
MLA nih tumin Tuivawl Bial a han vil deuh reuh a. A chhungte'n Sakawrdai Higher Secondary School-a thawk turin an lo tur lui sia, a thawk ta daih a. A hnu-ah B.Ed. te a rawn train leh a. "MLA nih tum kha senior lamah zirlai kan han ni țha leh a," a ti.
Mi Facbook Account an hack nasat laia Messenger-a Message kan dàwn ang chi kha Marema Account ațang hian min rawn thawn ve a. A Account an hack-sak ve a nih ringin ka block nghal a. A hnu lawkah WhatsApp-ah, "I va fimkhur ve," a rawn tia. Min prank lek chu lo niin.
A ho tluan țhak dawn emaw kan tih laiin tunah chuan Tuisual Group YMA President niin YMA Inkhawmpui Lian thlengtute zinga an hotupa ber a ni ta. Hneh takin an thleng turah i ngai ang.
Bollywood Star lar Mithun Chakravarty-in a style a lo la kher kher hi chu a țhiante kan lungawi lo.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: