Ticket to Hornbill – Band Battle 2025-ah Mizo pathum telna NOVO pakhatna an ni!

Aizawl | Oct 20, 2025: India a band inelna lian ber, ngaihhlut ber leh lawmman tam berna Hornbill Band Battle, (Ticket to Hornbill – India’s Biggest Band Battle 2025) Kohima, Nagaland-a neih chu October 18 khan zawh fel a ni ta a, Mizo pathum telna Novo pakhatna an ni.

Band tel tur hi online in India ram pum pui atangin entry 100 chuang a lut a, hetah hian a tha zual 30 thlan chhuah te chu October 17 khan an inelna hmasa ber live round neih a ni a, hetah hian Mizoram atangin band pali - The Prophets, Knot, Terrat leh Mood Station te an tel a ni. Mood Station band te hian next stage inelna finals an paltlang a, band dang pathum te erawh an vanduai a ni.

He intihsiakna hi Nagaland Sorkar hnuai-a Task Force for Music & Arts (TaFMA) an buatsaih niin, final-a hian Mrinmoyee Goswami, Booma, Obed Kath leh Subir Malik ten an judge a ni.

Final-ah hian band 9 - Juxtaposed (Bengaluru), Akhanda (Sikkim), Novo (Assam), Panic India (West Bengal), So Humble (Delhi), Mood Station (Mizoram), Stereo Groove (Nagaland), Thunder’s Cave (Meghalaya) leh Highlanders (Arunachal Pradesh) te an inlan a ni.

Individual & Special Awards

Best Keyboardist: Akhanda (Sikkim)

Best Drummer: Novo (Assam)

Best Bassist: Juxtaposed (Bengaluru)

Best Guitarist: Akhanda (Sikkim)

Best Vocalist: Stereo Groove (Nagaland)

Leading music brands presented Choice Awards to outstanding performers:

Sennheizer Choice Award: Thunder’s Cave (Meghalaya)

Ibanez Choice Awards: SoHumble (Delhi) and Mood Station (Mizoram)

Pakhatna hian lawmawm cheng nuai sawmhnih an dawng a, tin, individual prize an best drummer lawmman an dawng tel bawk.

Mizoram atanga tel Mood Station ten top three dinhmun hauh lo mahse, Ibanez Choice Award la in, electric guitar pakhat an dawng a ni.

Mizo pathum telna, Pakhatna band Novo te hi kum 2020 khan Haflong, Assamah an indin a, memberah hian Mizo pathum, Khasi pakhat leh Assamese Pakhat an tel a ni. An line up chu -

1. Thanghoulien Lienthang (Vocals)

2. Jason Joute (Drums)

3. Immanuel Joute (Guitars)

4. Deepjyoti Das (Guitars)

5. Winsome Tariang (Bass)

NOVO hian competition dangah te pawh lawmman an lo dawng tawhin, tlema langsar zual deuh pahnih han tarlang ta ila -

- 1st Runners up @ festival 2020 battle of bands, best Bassist lawmman nen

- Winners @Karbi Youth Festival Battle of the Bands 2022 best Drummer leh Best Bassist lawmman nen

India rampum inelna lian ber a zofate hming a lang te hi an chhuanawm hle a ni.