Rashtriya Poshan Maah 2025 lawmna hun hmang; hriselna atan duhthlanna dik leh hrisel kan neih a ngai

Aizawl | Oct 15, 2025: Directorate of AYUSH, Health and Family Welfare Department bul tumin vawiin khan Dawrpui Multipurpose Centre-ah Rashtriya Poshan Maah 2025 lawmna neih a ni. He hunah hian Health and Family Welfare Department Principal Director leh AYUSH Director ni bawk Dr Lalthlengliani chu Khuallian a ni a. Women and Child Development Director Zoramthangi Chhangte chu khual zahawm a ni. School sawm bik atangin zirlai 700 chuang leh zirtirtute lo kalin, he hun hi hlawk taka hman a ni.

Dr H Malsawmtluangi

Khuallian Dr Lalthlengliani chuan thu sawiin, taksa thau lutuk hi tun hma lam chuan mi hausa zawkte natna anga ngaih thin a ni a, mahse, tunah chuan mi nawlpuiah a tam ta hle a ti. Thau lutuk hian natna hrang hrang heng- zunthlum, BP sang, lung natna, stroke leh cancer chi hrang hrang a thlen theih avangin hriselna tiderthawngtu lian tak a ni a. Awlsam taka inven theih a ni bawk tiin a sawi a, kan ei leh in chu kan duhthlanna a ni a, chuvangin, duhthlanna dik leh hrisel kan neih a ngai tiin kalkhawmte a fuih bawk.

Dr Lalthlengliani

Directorate of AYUSH Deputy Director Dr S Mara Thansiami'n kalkhawmte lawmna thu a sawi a. Directorate of AYUSH Consultant Dr H Malsawmtluangi'n AYUSH System in Ei leh In Hrisel chungchang a zirtir dan te zirtirna neiin, Anganwadi Training Centre Nutritionist Saitluangpuii Sailo-in addressing Obesity tih thupuia hmangin kalkhawmte a zirtir bawk.

Directorate of AYUSH Programme Officer Dr Shirley Lalbiakzuali Chhangte leh Instructor ten exercise pawimawhna leh mahnia awlsam taka exercise lak theih dan inzirtirna an hmang bawk.

Lalrinawma Nalzawl khua-in kalkhawmte hi a rimawi mawi takin a awi bawk a ni.

AYUSH Asst Director Dr Lalkhawngaihi Renthlei-in lawmthu sawina hun hmangin he hun hi tihtawp a ni.

Rashtriya Poshan Maah (Nutrition Month) hi kum 2018-a India ram Prime Minister zahawm takin Ministry of Women and Child Development hnuaia alo tan tawh Poshan Abhiyan (Nutrition Mission) hnuaia hman thin a ni a. Ministry of AYUSH leh Ministry of Women and Child Development te’n thawhhona thuthlung an ziah atangin heng Ministry pahnih te tangkawp hian chawtha chungchang mai ni lovin, mipui hrisel, ram hrisel zawk kan nih theih nan a ei leh in tha leh nunphung dik pawimawhna a zirtir nasa hle a ni.

Kumin ah hian thupui ah, “Thau lutuk tura inven nana thlum, al, leh hriak ei tlem’tih hman a ni a. Tunlaia hriselna lama kan buaipui lian ber zinga mi, natna inkaichhawn chi ni lo (Non-Communicable Diseases) lama beihpui thlakna lam a hril a. Kuminah hian September ni 15 atanga October ni 16 thleng hi sorkar laipui chuan Nutrition Month atan a puang a ni.