Aizawl | Oct 25, 2025: MNF-in CM Lalduhoma dawt sawi-ah an puh; total bandh neih hmain 'Special Assembly' kohna tichhuak turin sorkar an ngen nawn.
MNF General Headquarters, Legal Board Vice Chairman Lalpianfela Chawngthu chuan vawiin chhun dar 12 khan Aizawl Press Club-ah thuthar thehdarhtute kawmin, “YMA inkhawmpui lian palaite hmaah leh zel dawt chiang tak sawi duh Mizoramin Chief Minister kan nei mek hi a vanduaithlak takzet,” a ti a, "Pawl thianghlim, politics rawngkai lo, mizote tana hlu em em YMA member thalaite punkhawmna leh zel pawh dawt hmanga campaign-na hmuna atana Chief Minister Pu Lalduhoma’n a hmang duh kha pawi kan ti a, zahpuiawm hlein kan hria," a ti bawk.
"Hetiang ang dan tha lo tak mai, CM chauhin a sawimawi, a Minister-te leh MLA te bakah ZPM Party ngei pawhin a thatna sawi tur an hriat miah loh dodalna atana MNF in October ni 29, 2025 a total bandh a huaihawt tur hi Zoram mipui zawng zawngten kan ram leh hnam tan a ni tih hria a, min thlawpa min tawiawm theuh turin kan sawm che u a ni. Chutihrualin, kan sawrkar pawhin total bandh neih hma hun tlemte la awmah hian he dan Assembly in a lo pawm tawhna official resolution hnuhkir a nih leh theihnana Special Assembly kohna tichhuak turin kan han ngen nawn leh bawk a ni," a ti bawk.
PRESS STATEMENT OF MNF General Headquarters, Legal Board Vice Chairman Lalpianfela Chawngthu
Dt. 25-10-2025 @ Aizawl Press Club
“YMA inkhawmpui lian palaite hmaah leh zel dawt chiang tak sawi duh Mizoramin Chief Minister kan nei mek hi a vanduaithlak takzet”.
YMA inkhawmpui lian vawi-75 na, Sakawrdai-a neih zawh takah khan ni 22.10.2025 zan khan vantlang inkhawmah Chief Minister Pu Lalduhoma’n Mizoram hmun hrang hrang atanga kalkhawm thalaite hmaah thu a sawi a. Pawl thianghlim, politics rawngkai lo, mizote tana hlu em em YMA member thalaite punkhawmna leh zel pawh dawt hmanga campaign-na hmuna atana Chief Minister Pu Lalduhoma’n a hmang duh kha pawi kan ti a, zahpuiawm hlein kan hria.
A Minister leh MLA te ngei pawhin a thatna an sawipui thawm hriattur awm miah lo, amah ngei pawhin dan sakei tia a lo sawi thin, FCAA 2023 Mizorama hman ve a duh leh tak thut chhan sawifiah tumna hmunah YMA inkhawmpui lian hi Chief Minister Pu Lalduhoma hian a hmang duh tlat mai a. Central sorkarin ram venhimna changchawia Mizoram chhung, a duhlai apianga hma a lak theihna tur chin, ramdang nena inrina atanga boruaka teha km 100 chin tih FCAA 2023-a tarlan chu km 10 chin chauh angin a sawi a, hetianga Dawt chiang tak thalai sang rual pungkhawmte hmaa a sawi duh mai hi a zahthlak hle.
Hei mai hi duh tawk lovin, Central sorkarin sipaite bu khuarna tura ram hectare 10 chin, forest clearance buaipui ngai lova rawn luah theihna tur pawh Left Wing Extremist te awmna state chauh huam tur ang leh Mizoram huam ve lo angin dawt chiang tak a sawi bawk a. Left Wing Extremist te awmna state-a sipaite hmun khuar theihna tur hi chu a hranga tarlan niin, hectare 5 aia zau loah tih a ni zawk.
Heng dawt ngialngan hmanga insawifiah a tumna hi duhtawk lovin, 29th Nov. 2023-a Guidelines lo chhuakah ram venhimna changchawia Central sorkarin hma a lakna turahte ‘State sorkarah dil phawt tur a ni, State thuneihna a sang ta a ni’ tiin dawt bawk a sawi zawm leh a. Guidelines ah hian state sorkarah dil tur tih reng reng a awm lo a, thuneihna tawp chu central sorkar kutah zel dah a ni a, Guidelines Para 28 ah chuan Central Sorkarin a tul ang zelin, state sorkarte hnenah hmalak dan tur a hriattir ang tih tarlan a ni a, FCAA 2023 Rules a ni emaw, Guidelines a ni emaw, thuneihna tawp chu Central sorkar kutah vek a awm a ni.
Mizoram CM-in thalai rual kalkhawm zinga a duh duh, thu belhchian dawll lote thlenga a chhim thal bekang puah pui phawng phawng mai hi a zahthlak a. FCAA chungchang kher loah pawh a thusawi dangte han ngaihtuah vang vang hian Mizo mipuite, a bikin thalaite a zah lo hle tih a lang chiang hle a. Amah pawhin a hriat chian loh dan, kan rama hman a nih ve theihna tur official resolution Assembly House-ah a naute a pass pui ta mai hi a vanduaithlak hlein kan hria a ni.
FCAA duhlotute hmasawnna (develoment) duh ve lo hial anga inpuhna lek lek a awm mek a. FCAA Mizoramin kan pawm (adopt) hma hian tuna kan ram hmsawnna kan hmuh zawng zawng hi thawh a lo ni tawh a ni tih kan han sawi nawn leh duh a. Kan ram leh hnam himna hralh kher lo pawh hian hmsawnna hna a thawh theih a ni tih hi lo hre nawn leh turin Zoram mipuite kan han chah nawn leh bawk a ni.
Hetiang ang dan tha lo tak mai, CM chauhin a sawimawi, a Minister-te leh MLA te bakah ZPM Party ngei pawhin a thatna sawi tur an hriat miah loh dodalna atana MNF in October ni 29, 2025 a total bandh a huaihawt tur hi Zoram mipui zawng zawngten kan ram leh hnam tan a ni tih hria a, min thlawpa min tawiawm theuh turin kan sawm che u a ni. Chutihrualin, kan sawrkar pawhin total bandh neih hma hun tlemte la awmah hian he dan Assembly in a lo pawm tawhna official resolution hnuhkir a nih leh theihnana Special Assembly kohna tichhuak turin kan han ngen nawn leh bawk a ni.
Issued by MNF Publicity Board, MNF General Headquarters, Aizawl, Mizoram
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: