"Ka tlak nawn leh chuan a zahthlak hle dawn a ni," ~ Sailova

Aizawl | Oct 21, 2025: CM Lalduhoma chuan Dampa Bial By Election neih tur atan, Dampa West Block Campaign chu Vawiin chawhnu dar 1:00 khan New West Phaileng-ah a Kick-off a,  ZPM-ah mi thar 205 a lawm lut.

ZPM Candidate Vanlalsailova chuan, "he bial hmangaihna kawngah hi chuan min tluk lo ang, Ka tlak nawn leh chuan a zahthlak hle dawn a ni," a ti.

CM Lalduhoma chuan, "Kum 38 vel chhung khan Congress leh MNF sawrkarna hnuaiah, ruling bial in lo ni tawh ţhin a. Tuna hetiang dinhmuna in awm chhan hi a lo bial tawhtu che u khan mawh an phur kan ti lo thei lo, a ti.

Minister C Lalsawivunga pawhin, "Thu dik tak hmangin ram leh hnam inrelbawlna hi sawi ila, dikna leh rinawmna nen kan ram tan ke i pen ang u. Rem leh rem lo va tute emaw sawichhiat bawih bawih te hi i ti ve lo ang u," tiin mipui a sawm.

PRESS RELEASE

(ZPM General Headquarters, Aizawl)

DAMPA WEST BLOCK CAMPAIGN KICK-OFF NEIH A NI

Aizawl, 21st October, 2025 : Vawiin chawhnu dar 1:00 khan Pu Lalduhoma chuan Dampa Bial By Election neih tur atan, Dampa West Block Campaign chu New West Phaileng-ah a Kick-off a,  ZPM-ah mi thar 205 a lawm lut.

Pu Lalduhoma chuan, Mizorama by-election awm tawhah hian ruling party an chak deuh vek a, hmun hnihah opposition an chak a. Phuldungsei-ah opposition an lo chak tawh a, chu chu boruak dang daih a ni a. Serchhip bialah MLA aţanga min ban avang khan by-election a awm a, he inthlanah hian kan chak a. Eng emaw thil danglam bik a thleng a nih loh chuan ruling party chanah dah a ni deuh ţhin. Dampa bialah pawh hian chutiang chu a kan beisei, a ti a. Dampa bial chu India rama district hnufual leh changkang lo, aspirational district a ni a. Hei hi ZPM chuan chhanchhuah che u kan duh a ni. Kum 38 vel chhung khan Congress leh MNF sawrkarna hnuaiah, ruling bial in lo ni tawh ţhin a. Tuna hetiang dinhmuna in awm chhan hi a lo bial tawhtu che u khan mawh an phur kan ti lo thei lo, a ti a. "Opposition bial in ni chungin Pu Vanlalsailova hian, 'Chu chu kan mamawh, chu chu min tihsak ve rawh,' a rawn ti ţhin a. Theih tawp a chhuah ţhin a ni. Special Priority Project hnuaia hna te pawh min rawn dil a. Chumi hnuaiah chuan khaw tinin hna in thawk mek a ni. Ka bial aiin in vannei," a ti. Dampa biala sawrkar hmalakna hrang hrang sawiin, kalphung thar mipui sawrkar thawhpuia ZPM candidate vote turin Dampa bial mipui a sawm a ni.

Pu Vanlalsailova chuan candidate atana puan a nih ațanga party hruaitute leh Campaign Committee hmalakna leh ţawiawmna zawng zawngah lawmthu sawiin, unit leh block thawhrimna leh inpeknaah lawmthu a sawi a. "Kan bial hi opposition bial aţanga ruling biala awm ve tur leh he bial chhanchhuak tur hian, party sawi lova min vote vek turin ka ngen che u a ni," a ti a. Kum 2023 inthlana hnehna a chan zawh loh avangin bial mipuite hnenah ngaihdam a dil a. "Kan bialtu MLA boral ta Pu Lalrintluanga Sailo  hmalakna leh duhthusam tihlawhtling tur leh ruling bial ni ngei turin, ruling bial nih leh theihna hun țha rawn inher chhuakah hian theih tawp min chhuahpui turin ka ngen che u a. Chutih rualin ka elpuite hi thiamna leh tawnhriatah pawh ka tluk lohte an ni. Amaherawhchu, he bial hmangaihna kawngah hi chuan min tluk lo ang," a ti a. "Ka tlak nawn leh chuan a zahthlak hle dawn a ni," tiin bial mipuite khawngaihna a dil.

Pu C Lalsawivunga chuan, MLA term hnihna ka hmang ve mek a, chutih chhung chuan by-election vawi thum ka hmachhawnna a ni ta a. By-election neih a ngaih chhan kan hria a. Pu Andrew H Thangliana a thih avangin by-election neih a ngai a. Tuna kan Chief Minister Pu Lalduhoma chu, 'A ZPM em mai' tih vangin ban a ni a, By-Election neih a lo ngai tawh bawk a. Dampa bialtu MLA Pu Lalrintluanga Sailo thihna avangin By-Election neih a lo ngai leh ta a. Vawiinah hian kan duh vang ni hauh loin by-election neih a lo ngai ta a. Kan MLA duh tak ni mah se, lo theih lohin inthlan ţhat a lo ngai ta si a. By-Election kan lo hmachhawn tawh dan te ka ngaihtuahin, ruling bial nihna hun țha in neih hi in bawhpelh loh a, ruling party candidate  vote tlin nachang in hriat ka beisei a. Lungrual taka lo vote vek turin ka sawm che u a ni," a ti a. Opposition party-te hi, ram leh hnam kaihhruaina tur policy mumal tak an nei lo em maw ni tih turin, an thu sawi tam ber chu ZPM sawichhiat a ni ber mai a. Politics hi a pawimawh em em a, tu mah inthiarfihlim thei kan awm lo. Politics bawlhhlawh avang hian chhungkua, khawtlang leh ramin a tuar thei a ni. Thianghlim takin politics hi a khelh theih a ni tih hre thar leh i la. Thu dik tak hmangin ram leh hnam inrelbawlna hi sawi ila, dikna leh rinawmna nen kan ram tan ke i pen ang u. Rem leh rem lo va tute emaw sawichhiat bawih bawih te hi i ti ve lo ang u," a ti.

Pu C Lalnunnema, Chairman, Dampa Bial By-Election Campaign Committee pawhin thu sawiin, "Dampa Bial By-Election lo awm turah ZPM chuan West Phaileng khaw mi ngei Pu Vanlalsailova kan han thlang chhuak a. Pu Sailova hi 2023 Election-ah khan vote tlem tein a tling lo va, tunah hian mi thar eng emaw zat kan lawm lut tawh a, a tling ngei tawh ang tih kan ring tlat. Dampa bial hian ruling bial nihna hun remchang țha tak in neih hi in bawhpelh lo ang tih kan ring. Pu Sailova ringawt hi kan rawn zuar lo a, kan Chief Minister Pu Lalduhoma leh kan Minister-te hi kan rawn zuar tel a ni," a ti.

Vawiina Dampa Bial By Election Campaign Kick-off hi Rev. Lalremliana Colney, Chairman, Mizoram People's Forum, West Phaileng chuan a kaihruai a, Dr. C. Lalrammawia, Secretary, Dampa Bial By-Election Campaign Committee chuan report a pe a, Pu Lawmthanga, Mizoram Poor Federation, tunhnaia ZPM party zawmtu chuan thu a sawi bawk.

Sd/-

(ZIRSANGLIANI MANGPA)

Jt. Secretary

Media & Publicity Department, ZPM General Headquarters, Aizawl

PR No.ZPM-02/02A/2025/84

Dated 21st October, 2025