Home Minister-in State Social Welfare & Rehabilitation Centre tlawh, Scout Silver Award lawmna hmanpui

Aizawl | Oct 18, 2025: Home Minister K Sapdanga chuan vawiin chawhnu khan a bial chhunga Social Welfare Department hnuaia State Social Welfare & Rehabilitation (SSWR) Centre a tlawh a, Scout Silver Award lawmna a hmanpui nghal. Minister hi Urban Development & Poverty Alleviation (UD&PA) Director Jacob Lalawmpuia'n a tawiawm a, award lawmpui nan UD&PA atangin Rs 20,000 (Singhnih) a hlan.

K Sapdanga chuan thusawiin, "Vawiinah hun hlu tak mai SSWRC ten National Award hlu tak in dawn lawmna hun kan hmang hi a ropui ka ti hle a, Social works lamah hian mite tluk lo mah ila, theih ang tawk tawka tui taka inhmang ve thin ka ni. YMA-ah te leh chanchinbu lamah te kum tam tak kan lo hmanhlel ve a, ngun taka ka ngaihtuah fo thin chu, mihring ten kan damchhunga kan thiltihah hian engnge ropui ber ang tih hi a ni. Mi dangte thil zirtir te, damlo tihdam te leh sakhaw rawngbawlna te hi hna ngaihsanawm tiin an lo sawi thin a. Vawiinah hian damchhung huna thil ropui nia mithiam ten an lo sawi thin thil pathum kan sawi te khi he Centre-ah hian tihkim vek a ni a, he rawngbawlna hi a ropui tak zet a ni. Kan mission tihhlawhtling tura hmun tha, mi dang tlawh pawh phak em em lo tura hna thawhna hmun chu he hmun hi a ni. Damna mamawh nia inhria te tana damna hmun, thiam neih duha lo pungkhawm, hmabak nei tih inhriaa mahni inpawma helai hmuna awm te hi mi huaisen in ni. Tunlai hian Aizawl khawpuia kan buaipui leh kan chanchin hriat zin em em chu, thihna rinhlelhawm leh rilru tina vawng vawng, an thih chhan pawh kan inrinsiak te hi an ni. Nun dawihzep vangin harh fima khawvel hmachhawn ngam lo kan tam em em hi a pawi tak zet a ni. Damna atana pawimawh ka tih em em chu ni tina hmalam pan, chona thar hmachhawn ngam nun hi niin ka hria a, vawiina helai hmuna enkawl mekte leh a enkawltute pawhin hei hi infuih nan lo hmang zel ula ka duh hle a ni. Hmanhmawh lovin hmalam beiseina nei ila, huaisen takin khawvel i hmachhawn zel ang u," a ti.

He Centre hi kum 1990 khan Protective Home tih hming vuahin din a ni a, kum 2020 khan tuna a hming ang hian thlak a lo ni ta a ni. Kuminah Centre hian kum 35 a tling tawh a. Centre awm hun chhung Course hi thla 7 a ni. Tunah hian thawktu mi 22 an awm mek. Centre-ah hian mi 1,400 chuang enkawl an ni tawh.

Award lawmna hun hi Caseworker C Zothansangi'n a kaihruai a; Presbyterian Church of India (PCI) Mizoram Synod Executive Secretary Rev Dr KLallawmzuala'n hunserh a hmang a; SSWRC Superintendent Lalnunmawii'n lawmthu a sawi a ni.