" . hnam chak tak nih zel kan duh chuan, hmelma siam aiin thian siamah tan la ila; ram rorelna do aiin sorkar thawhpui hian hnam a tichak zawk fo bawk,"

Muolhoi | October 3, 2025: Assam Hills Region a cheng, Hmar hnam chuan Haflong, Moulhoi Field-ah Hmar Inpui din champhaphak vawi 25-na lawmna chu vawiin khan Muolhoi-ah hman a ni a, Mizoram Home Minister K Sapdanga chu Khuallianah tangin, Khualzahawm atan Tourism Minister Lalnghinglova Hmar niin, Adviser to CM Lalmuanpuia Punte, MLA chu Khualthaah a tang bawk.

Khuallian K Sapdanga chuan thu sawiin, "Vawiinah hian pawl pakhat Silver Jubillee kan lawm a ni ringawt lova, hnam tuarchhel tak leh huaisen takte'n kan chak kan lawm a ni. He pawl hi kum 25 chhung zet hruaitu hmasaten tumruhna leh huaisenna nen zinkawng min lo zawhpui a, hnam lung an lo phum a. Chu hmachhawp chu keini thangtharte min hnutchhiah a ni. Hmar hnam tizahawm turin, inpumkhatna a awm theihna atan rual ute'n meichher an lo chhi a. Kan tum ram pana kan kal mek laiin hei hi theihnghilh lo ila, hnam chak tak nih zel kan duh chuan, hmelma siam aiin thian siamah tan la ila; ram rorelna do aiin sorkar thawhpui hian hnam a tichak zawk fo bawk. Kan rual ûte'n mit lova meichher an lo chhit hi naktuk atangin in kovah a innghat ve tawh dawn a, khawvel inherin changkanna a rawn her chhuahpui zel a, thiamna leh taimakna hi ralthuam tha ber zinga mi a ni tih hre reng ang che u. He Silver Jubillee hian Hmar thalai zingah Central Service te, State service leh, lehkha thiam tak tak lo hring chhuak mawlh rawh se," a ti.

Tourism Minister Lalnghinglova Hmar pawhin thu sawiin, "Assam state-a Hmar mipuite hian in mamawh chu Politician thiltithei te emaw an ni lova, lehkha thiam in mamawh a ni. Hnam zahawm ni tur chuan lehkha thiam kan tam a ngai a; hnam dang kara awm in nih avangin zirnaah in kir leh a ngai. Hnama lunglenga luangliam ringawt lovin, he hnam hi a ropui telh telhna turin Hmar hnam zingah officer lian kan tam a ngai. Tuna kan awmnaah hian lungawi i la, Pathianin tuna kan chenna Haflong-ah hian min dah a, rilru nghet pu ang u. He hnam hi hmun hrang hrangah Pathianin min dah a, kan awmna ram hmangaih takin, hnam thinlung pu chungin a awm theih. Mihring tam hi kan hnam hma hun atan a pawimawh hle bawk a, tam ringawt ni lo, thiamna nena tam zel turin tan i la ang u," a ti.

Adviser to CM Lalmuanpuia Punte, MLA pawhin thu sawiin, "Hmar hnamah chauh luangliam mai lo va, Zohnahthlak hnam hrang hrang, Assam Hills Region-a awmte nena inkawm ngeiha thawk ho turin, a hmahruaitu lo ni ula, Zohnahthlakte hui khawmtu lo ni ang che u," a ti bawk.

He hunah hian K Sapdanga chuan Hmar Inpui Silver Jubillee Lungphun a hawng a; Lalnghinglova Hmar chuan Hmar Students Association din champhaphak vawi 87-na flag pawt pharhin, Lalmuanpuia Punte-in Silver Jubillee Souvenir a tlangzarh bawk a ni.

Hmar Inpui, Assam Hills Region hian Assam state-a District pahnih - Dima Hasao leh Karbi Anglong District a huam a, khaw 50 chuang zet a awm a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]