Health Minister-in Blessino Nursing School 7th Capping, Lamp Lighting & 4th Graduation Ceremony telpui; Blessino Pharmacy Institute a hawng

Aizawl | Oct 30, 2025: Health Minister Lalrinpuii'n vawiin khan Blessino Nursing School 7th Capping, Lamp Lighting & 4th Graduation Ceremony chu khuallian niin a hmanpui a. Kumtina mi 60 zir theihna tur, Blessino Pharmacy Institute a hawng nghal bawk.

Khuallian Lalrinpuii chuan Blessino Group of Institutions-te’n bung thar an kai chu a lawmpui thu sawiin, Pharmacy Institute an hawng thei chu ropui a tih thu leh Mizoram chhunga pharmacy zir turte tan a lawmawm thu a sawi a. Pharmacy chu profession hlun leh zahawm a ni, tiin, damdawi in hrang hrangah pharmacist mamawhna a sang tih leh thingtlang PHC leh CHC-ah pharmacist post ruak a tam thu a sawi a. Hmasawnna leh hmuhchhuah thar a awm reng dawn a, chu vang chuan zirlaibu pela chona hmachhawn ngam turin zirlaite a fuih a ni.

Minister chuan mipui hriselna atan nurse leh pharmacist-te chu an pawimawh a, pawimawhna chuan mawhphurhna sang a ken tel thu sawiin, dam lo enkawl piah lamah hriselna kawnga mipui vantlang zirtira kaihruai tura hma la turin a sawm a. Khawhawi tizauva foreign-ah leh sipai lama hna zawng turin a fuih a ni.

Health Minister chuan Blessino Nursing School leh Pharmacy Institute-te chu nurse leh pharmacist mai ni lova mi puitling, chhungkaw innghahna tlak, mahni intodelh, ruihhlo laka fihlim, midangte nun tha zirtir tum mi chher chhuak turin duhsakna a hlan a ni.

Vawiinah hian nursing zir chhuak mi 26 te thlahna leh lut thar mi 30 te lawmna hun hman a ni a. Mizoram State Planning Board Vice Chairman Dr. Kenneth Chawngliana pawh telin, Blessino Nursing School Principal VL Muanpuii leh Blessino Pharmacy Institute Principal Dr Zothanmawia te’n report an pe a. College of Nursing, Synod Hospital Durtlang Principal C Lalrintluangi'n Capping leh Lamp Lighting a kaihruai a. College of Nursing, RIPANS-a Asst. Professor Dr C Lalramdini'n Certificate semna leh Graduate tharte lawmpuina hun a hmang a. Managing Board lam atangin Merit Prize semna leh subject topper-te chawimawina hun hman a ni bawk. Blessino Group of Institutions Managing Director Dr C Vanneihthanga chuan lawmthu sawiin hun a khar a ni.

Blessino Nursing School, Maubawk hi kum 2019 a din niin Mizoram Nursing Council (MNC) leh Indian Nursing Council (INC) pawmpui a ni a. Kum tin zirlai 30 lak thar thin niin, vawiina graduate-te nen hian zirlai 120 leh tutor 10 an awm mek a. Kumin Mizoram Nursing Council exam-ah khan Top 10-ah an zirlai zinga mi 6 an inhlangkai a ni. Parent Hospital hi Aizawl Hospital and Research Centre niin, affiliated hospital Civil Hospital Aizawl, Zoram Medical College, Kulikawn Hospital, Mizoram Cancer Institute, Aizawl Adventist Hospital leh Greenwood Hospital-te an nei a. An zirlai kalchhuakte Japan-a an thawh zawm theih nan GS Agency, Japan nen inremna thuthlung an ziak tawh bawk a ni.