"Champhai District-ah kan Department hnuaiah cheng nuai 9,638.84 man hu hmalakna kan nei,"

Aizawl | Oct 18, 2025: Minister of State Lalnghinglova Hmar chuan vawiin October 18, 2025 chawhnu khan Circuit House, Champhaiah thutharthehdarhtute hmaah a department chan pali - Sports & Youth Services, Tourism, LESDE leh Excise & Narcotics - kaltlanga Champhai District-a project leh hmalakna hrang hrangte puangin, kum hnih chhungin Champhai District chhungah cheng nuai 9638.84 a tlin tawh thu a sawi.

Hnahsin Kut hmanga nimina Champhai a kal hnuah he hun hi an hmang a, Adviser to CM TBC Lalvenchhunga, KVI Board Chairman C Lalremliana te bakah Excise & Narcotics Commissioner Z Lalhmangaiha leh Tourism Director R Lalrodingi leh department officer dangten an ṭawiawm.

Lalnghinglova chuan, "Champhai hian kawng hrang hrangah theihna a nei sang a, a bikin tourism lamah theihna a nei sang takzet a, chu chu Hnahsin Kut-ah kan hmu a ni. Tourism tihhmasawnna turin sorkarin ruahmanna lian tak tak a nei," tiin tun hnaia an hmachhawpte a puang.

LESDE hnuaiah hmasawnna tam tak a thleng mek tih sawiin an hmalaknate leh Champhai District puala an thawh chinte a tarlang a; Sports and Youth Services Department hnuaiah Mizoram State Sports Council kal tlangin Chhangphut Field-a zana inkhelh theihna siam a nih hnuah New Champhai khelmual chu cheng vaibelchhe 12 chuanga siam a nih tur thu leh sum a awm tawh thu a sawi.

Excise Minister chuan Champhai District chu ramria awm a nih avangin ruihhlo leh sorkar phal loh thilin a paltlang nasa a, thawktute an rimin theihtawp an chhuah tih a sawi a; ruihhlo an man zat leh thubuai an siamsak zat aṭangin an thawh nasat dan a lang, tiin fakawm a tih thu a sawi.

Chawhma lamah Minister hian hna an thawhna tura project hmachhawpte a hmunah a tlawh a, Champhai DC Pu Mohammad Aaquib leh Tourism Department mi leh sâten an ṭawiawm a, khelmual ennaah Champhai District Football Association hruaituten an ṭawiawm bawk ni.

Lalnghinglova Hmar hian October 17 (Zirtawpni) zana Hnahsin Kut kharna hun a hmanpui a, thu a sawi bawk a ni.

Lalnghinglova Hmar chan Department palia Champhai District-a hmalakna leh hmachhawpte:

1. Heritage and Cultural Centre, Champhai - Rs. 3387.25 lakhs (Swadesh Darshan 2.0 under Ministry of Tourism

2. Eco-Resort Experience at Keilungliah, Champhai (Swadesh Darshan 2.0 under Ministry of Tourism)

3. Development of Basic Amenities under PRASHAD Scheme in Vangchhia, Champhai District - Rs. 547.32 lakhs (Ministry of Tourism)

4. Construction of Artificial turf (football) at New Champhai - Rs. 1201.52 (PMJVK)

5. Chhangphut field floodlight - Rs. 457 lakhs (SASCI 2023-24. Hei hi December 12, 2024 ah Hon’ble CM Pu Lalduhoma’n a hawng a ni).

6. Hnahsin Kut sponsor: LESDE Department atangin Rs. 10 lakhs leh Tourism Department atangin Rs. 3 lakhs)

7. LESDE Department hnuaia Mizoram Building & Other Construction Workers Welfare Board (MBOCWWB) atangin Champhai District-a Welfare Board memberte puihna - Rs. 147.30 lakhs