~ K Remruatfela
 |
| Pic: Bzi Tochhawng @ Hnahsin Kut 2025 |
Khua a lum em avangin thlan ti dai turin turin tukverah ka dak chhuak a. Khami ni ber khar kha engti zia nge ni, tlai lam tawh, ni dul tawh lam mah ni se, boruak a up churh a, thli che reng reng pawh a awm eih lo. Lum chuan min ti chau a ni mahna, ka phone khawih lai pawh hre chang tawh lovin tukverh bulah chuan ka mutthluk san a. Ka han harh meuh chuan ka phone hi zawi te in a lo ri ral ral a, ka`n lek kang a, ka han enchiang chu nula aw nem no tak, dam diai chunga a zai ri ral ral lai hi a lo ni a. Chu nu chu tu dang ni lovin, Bzi Tochhawng ngei hi a lo ni.
Chumi tlai zet chu Bzi zai chuan min hneh tak zet a. Nidanga ka ngaihthlak liam mai mai thin ang kha a ni ta hauh lo. Ka play zo chiah tiin ka play nawn leh thin a. Duhtawk reng ka nei thei lo. A mak asin, amah Bzi hi ka hriatna a rei tawh a, zin vei vahna velah te pawh a hla hi ka ngaithla fo tawh thin a. Zaithiam ka tiin a hla pawh nalh ka ti em em thin. Amaherawhchu, tlang takin sawi ila, hla dang ka ngaihthlak angin ka ngaithla liam puat mai zel a, ka thinlungah thawk zui em em a awm ngai hran lo. Nimahsela, chumi tlai zet zawng, a rau hian min man a, min bawhbet a ni ber mai. A zai leh a hla eng pawh mai hian lairil a fan vel vek a. Eng tin nge ni, hetianga aw nalh dangdai, mi hneh theihna ruk riau nei, Bzi ang hi khuannu hian a lo siam theih, Pathian chauh lo chuan hetianga aw ngaihnobei hi tuman an siam thei lo ang, Pathian hi a lo awm chiang a ni ka ti rilru vawng vawng mai.
Tichuan, haw zai reng rel thei lovin ka phone chu ka ti ri nawn leh thin a. Tunlai thangthar zinga musician lar tak, Ben Opa nen an tih chhuah dun ‘Ka dawn ngam lo’ tih hla ka han ngaithla phei chu ka tliak hnawp hian ka in hria. Aw ngaihnobei taka, ‘I tiam thu di min hlan lai khan, I tangah beiin tudang ngai lovin; Duhaisam hmatiang thlir dunin, Ti hian min hlan thin: Ka kianga awm reng turin, kumtluang min tiam a’ a han tih hnap maite chuan min ti mur sung sung a, suangtuahna khawvelah min chen tir a, a rukin ka nui khi ver ver mai. Amaherawhchu, ka han ngaithla leh zel a, a thunawn ka han ngaithla thleng chu beisei loh takin ka mood a thlak thleng ta hlawk! Lungchhe taka ‘Mahse, khuanu`n tiang tur hian min lo duang ta si, leng dun lo turin; Ka ngai ngam lo, lengdang i pawm hun tur, I thai a chang tur hi ka dawn ngam lo’ a han tih zet chuan kei, mipa luhlul inti ve tak pawh ka insum zo ta lo a, ka inhru ru ta faih faih hial zu nia! Zaithiam chul thei lo, Engelbert Humperdinck insum zo lovin a la duat nin theih loh ngawih ngawih hnena rilru hliam na tak chunga ‘Guess I could find somebody too, But I don`t wan`t no one but you; How could you leave without regret, Am I that easy to forget’ a lo tih tlawk tlawkte kha suangtuahna khawvelah a lut lo thei lo.
Bzi hla bawk chu ka han ngaithla zel a. Music tliang nalh tak kara ‘Duhlai, nang nen kan intawn kha, tiang reng hi ka dawn ngai lo; Lenrual zingah hlim ten chaiin, Mahse, kan lo lut thuk ta lua a lo ni’ a han ti hnap hnap chuan kar lovah min awi mu leh dawn ringawt a. A hla zun chuan min uai betin min awi delh delh a, min chhem mu chu a ni leh ta ber mai. Mut chhuak hle mah ila, mutthilhsan erawh ka phal chuang si lo, inti pachang luiin ka thutmun ka rem tha a, a thunawn ka han ngaithla chho, aw fiah fel taka ‘Hmangaihna li-ah zuang lutin, A thukzia kan hre mawlh si lo; Tunah chuan ka pil zo ta, Eng vang kher nge ka lo tawn che; Mampui, eng ti zia nge, hlim ten kan len lai khan, Ka tleirawl thinlung thianghlim, min lo ruksak mai le’ a han tih zet kha chuan hmangaihna luipui an tih, missipsipi luipuiah min zuan luh tir a, che chang zel turin chakna reng ka nei ta lo! A ni taka, hmangaihna lipuia han zuah luh meuh hi chuan hriat loh karah khawvel dangah kan lo pakai dawrh a. Engkim mai hi a danglam ta thin. Bryan Adams meuh pawhin ‘When you love someone, You`ll do anything, You`ll do all the crazy things that you can`t explain, You`ll shoot the moon – put out the sun, When you love someone’ a lo ti ngawih ngawih ve hial a nih kha!
Khua ka han hawi chhuak chu, a lo thim thiap tawh a, thawm pawh a zawi sawt ta hle. Nimahsela, keizawng Bzi aw chuan min phuarbet tlat tawh avangin haw zai reng ka la rel thei lo. ‘Hmangaih vangin’ tih a sak chu ka han play zui leh a – “Duhlai ka di bawihte, ka lam lo hawi leh la; Lenrual zaleng zingah, Nemte`n min pawm leh la: Chutin ka thinlai ril, Lung ianga lo sak tawh hi, Hmangaih vangin tui iang a nem nang e, tih ka han ngaithla thleng ngat phei kha chu hmangaihna hi a van lo ropui em tih bak rilruah thil dang a lut thei tawh lo. Hmangaih chan meuh hi chu a lo na niang, Elvis Presley meuh pawhin a hmangaih a han chan meuh chuan insum zo lovin ‘As my memory turn backs the pages, I can see the happy tears we had before; Now the love that kept this old heart beating has been shattered by the closing of a door’ tiin a rum a. ‘There goes my everthing’ tiin a tap chhuak ta hial zu nia. A van lainatawm tak em!
Hmangaihna zawng a ropui a nih hi, Cliff Richard meuh pawhin – “When the girl in your arms is the girl in your heart, then you have got everything. When you are holding the dream, You have been dreaming you would hold. You`re rich as a king. So hold her tight, and never let her go, day and night let her know you love her so. With the love of your life spend the lifetime of love, make her yours forever more” tiin hmangaih kan tawng a nih chuan chelh tlat tur leh kumkhuaa thlah leh ngai tawh lo tura kuangkuah tlat turin min chah lawm lawm a. Khawvela kan mi hmangaih ber kianga awm thei te hi mi vannei ber kan lo nih zia ka hre thar vawng vawng mai. Bzi zar vek a ni e.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: