Sikul leh zirlaite'n an tuar theih tur khawpa zirtirtu insawn dil awm ṭhin chu zirtirtute inngaihtuah nawn a ṭul

Lunglei | Sept 4, 2025: Vawiin khan Lunglei District Level Committee on Teachers' Day 2025 huaihawtin Saikuti Hall, Lungleiah Zirtirtute Ni (Teachers' Day) vawi 64-na pualin hun hman a ni.

He huna khuallian, Lunglei West bialtu MLA T Lalhlimpuia chuan zirtirtu kal khawmte chu zirtirtute ni chibai bukin, ziak leh chhiar thiam tam lama Mizoram dinhmun chu 95% ni mahse, hmasawn zel a ṭul thu leh chumi atan chuan zirtirtute an pawimawh thu a sawi a. Zirtirtute chu ruihhlo laka inthiar fihlim a, an zirtirna leh an nun dana zirlaite tana zir tur chhawp chhuak tura chahin, zirlai naupangte'n chhawr tlak thiam thil an neih theih nana skill development lama ngaihtuahna seng turin a chah a. Sikul leh zirlaite'n an tuar theih tur khawpa zirtirtu insawn dil awm ṭhin chu zirtirtute inngaihtuah nawn a ṭulna a nih thu sawiin, zirtirtute chu an hna thawhah mahni inen let fo va, hmasawn zel tum turin a chah a. Zirtirtu hna chu hna zahawm leh hlu tak a nih thu sawiin, a zahawmna leh a hlutna chu an zirtirteah a lang chhuak ṭhin tih hria a, ṭhahnem ngaihna leh inpekna thar nen Mizoram zirna tihmasawn tura theih tawp chhuah zel turin zirtirtute chu a fuih a ni.

Khual zahawm, Lunglei District Bawrhsap Navneet Mann pawhin thu sawiin, ei zawnna kawng hrang hrang bul ṭanna chu zirna a nih avangin tleirawlte nun leh an hma lam hun atan zirtirtute'n mawhphurhna sang tak an nei, a ti a. Zirna dinhmun chhiat leh ṭhat chu zirtirtute zirtir danah a innghat tih hre thar tura chahin, Lunglei District-a zirtirtute chu an naupangte hma lam hun siamtu mai bakah, District leh ram hmasawnna thlen theitu an ni tih hre renga rilru thar nen hma lam pan zel turin duhsakna a hlan.

Lungleia Zirtirtute Ni lawmna inkhawm hi District Education Officer (DEO) Micky R Lalenkawla'n a kaihruai a. District level-a Zirtirtute Ni hmanna tur chu a hranpaa sum ruahman a awm loh thu leh DEO, DPC Samagra Shiksha leh SDEO office te sum thawh khawma hun buatsaih a nih thu a sawi a. Lunglei khawpui chhung Pukpui leh Theiriat inkara sawrkar sikula zirtirtute bakah, Samagra leh Adoc Aided School-a zirtirtute koh khawm a nih thu a sawi.

Rev V Lalzarliana (BCM Chanmari Pastor Bial) chuan hunserh a hmang a. Zirtirtute Ni puala Mizoram sawrkara School Education Minister Dr Vanlalthlana thuchah chu Lunglei Government Higher Secondary School-a Class XII-A zirlai, TC Zorinsangi'n chhiar chhuakin, Dr S Radhakrishnan chanchin chu Baptist HSS Serkawna Class XI (Science) 'B' zirlai, Angel Lalruatkimi chuan a chhiar chhuak a. Zirlai naupangte'n special item hrang hrang entirin, Kala Utsav-a ti ṭhate lawmman sem nghal a ni bawk a. Zirtirtu kal khawmte hnenah thilpek hlan niin, Lunglei North Sub-Divisional Education Officer Lalnunhlui chuan lawm thu sawiin hun a khar.

Zirtirtute Ni hi a ni tak chu September ni 5 ni mah se, kumin hian sawrkar chawlh a nih avangin September ni 4-ah Zirtirtute Ni pualin hun hi hman a ni a. Lunglei District Level Committee on Teachers' Day 2025-in a rel angin Lunglei khawpui chhung hmun pawimawh lai hmun ngaah Teachers' Day pual thuziak (banner) tar niin, sikul leh college te'n an remchan danin zirtirtute chawimawina thuziak (steet poster) an tar bawk a. Zirtirtute Ni puala District Bawrhsap thuchah leh DEO thuchah chu cable TV, Akashvani leh social media kal tlang te'n puan chhuah a ni bawk.