Runliani thattu-a puh court-ah inlan, a thlavang hauhtute Court tual-ah pungkhawm

Aizawl | September 4, 2025: Vawiin khan Runliani (80) Maubawk thattu a puh Vanlalmuanchhana (21) chu Court-ah a inlan a, Runliani thlavang hauhtu Maubawk Branch YMA leh MHIP huaihawtin Maubawk mipuite chu Aizawl District Court tualah an pungkhawm.

Tarlan tawh angin Runliani (80), Maubawk chu August 19 khan thah niin, August 23 khan Vanlalmuanchhana chuan Police hmaah a thah a nih thu a inpuang a, Central Jail-ah dah luh nghal a ni.

Runliani (Luti) w/o Lalsanga (L) Maubawk Kawn veng hi a nghawng vei lamah viuh niin, a hrawk ding lamah inches 5 vela zau zai a ni bawk.

August 20 khan, a thihna avanga rinhlelh mi pathum chu man nghal an ni. Mahse, Runliani thattu an rinhlelh zinga tel lo, theihtawp an chhuah hnuah tualthattu hi Vanlalmuanchhana (21) s/o Zairemmawii, Maubawk tih an hre chhuak. A inpuanna leh an hnu chhuina atangin hriat chhuah a ni.

A thattu hian a thah chhan ber chu pawisa a nih hmel. Rinhlelh man zinga mi ni lo, mi dang August 23 khan man a ni. Runliani bag a lo kawl atangin an man a, a pawisa hman bang an hmu let a, Rs. 2000 vel a la.

Runliani hi a fanu leh a tupa nena cheng an ni a, an in chhungah eichawp dawr an siam a. A chenpuite hi an chhuak vek a, an dawra thil lei turin, August 19 chhun dar 12:30 velah thiin a hmu a ni.