PM-in Bairabi - Sairang rel kawng thar hawng; Mizorama rel service thar pathum - Sairang to Delhi Rajdhani Express, Kolkata Express leh Guwahati Express vailiam

Aizawl | September 13, 2025: Vawiin khan Prime Minister Narendra Modi chuan lehlangin Mizoram a rawn tlawh a, Rs. 8071 Crore senga siam Bairabi - Sairang rel kawng thar, 51.38 kms a thui a hawng a, Mizorama rel service thar pathum: Aizawl - Delhi Rajdhani Express (Anand Vihar Terminal), Aizawl - Kolkata Express leh Aizawl - Guwahati Express te a vailiam bawk. Prime Minister hian November ni 29, 2014 khan he rel kawng sakna tur lungphum hi a lo phum tawh a. Vawiinah amah ngeiin a hawng leh ta a ni.

Heng bakah hian Rs. 33 crore senga sak Residential School, Kawrthah (Ministry of Minority Affairs) leh Rs. 24 crore senga sak Tlangnuam Eklavya Model Residential School (Ministry of Tribal Affairs) chu a hawng bawk a. Rs. 500 crore senna tur Aizawl Western Side Bypass Road (MDoNER), Rs. 226 crore senga thawh tur Mualkhanga 30 Tounsand Metric Tons Per Annum Gas Bottling Plant (MoP&NG), Rs. 70 crore senga thawh tur Chhimtuipui (Tuipui Ferry) lei (Bridge) (MoRTH), Rs. 45 crore senga thawh tur Thenzawl - Sialsuk kawngpui (via Sathlur & Lau river) (MDoNER), Rs. 32 crore senga laih tur Khankawn to Rongura Hmun kawngpui, Serchhip district (MDoNER) leh Rs. 12 crore senga thawh tur Khelo Multipurpose Hall, Tuikual, Aizawl (Ministry of Youth Affairs & Sports) te lungphum a phum bawk.

Prime Minister chuan, Aizawl rawn lut ta lo mah ila, min duhsakzia ka hmu a, ka lawm hle. Lalnu Ropuiliani leh pasaltha Khuangchera ten ram hmangaih tura min zirtirnate kha rilruah a awm reng thin. India ramin hmasawnna kawng a zawhnaah Mizoramin hmun pawimawh tak a chang tih a lo lang a. Aizawl chu India Railway Map-ah a lang ta. A lungphuntu ka ni thei leh a hawngtu ka ni thei hi ka lawm hle. He rel kawng sial hi a hautak em em a, kan Engineer leh hnathawktute inpekna ropui tak vanga lo hlawhtling thei chauh a ni. Sairang - Delhi rel kawng thar hi inkalpawhna a ni satliah lo, kawng tinrenga hmasawnna thar lo thleng tur tana a kulpui a ni. Sumdawng te, loneitu te, zirlaiten an chhawr hle dawn a, hriselna lamah pawh kan tangkaipui hle ang. Sector hrang hrang kawngpui, energy, sports leh a dangte pawhin hma a sawnpui dawn a ni, a ti.

Kan sorkar hnuah hmarchhak bial tan hmasawnna hna kan thawk hnem tawh hle a. Kan la thawk zel dawn. NE India leh SE Asia hi Mizoram kaltlanga thlunzawm kan tum a, Act East Policy hnuaia Kaladan Multi Modal Transit Transport Project leh Sairang to Hmawngbuchhuah rel kawng hmangin NE Economic Corridor, Bay of Bengal kaltlangin Asia chhimchhak ram te kan thlunzawm dawn a ni.

Hmarchhak bialah hian Thingtlang kawng te, National Highway te, Mobile Connection, electricity, Tap water connection, LPG connection leh hmasawnna dang pawh kan thawk nasa hle a. RCS - UDAN Scheme hnuaiah Mizoramah Helicopter Service thar kan dah belh dawn bawk. Tun hmaa ngaihsak hlawh ngai lote khan vawiinah chuan hmun laili an chang ta a ni, a ti.

India hi ram changkanga siam tumin kan kal mek a, Mizoram pawhin hemi atan hian hmun pawimawh tak in luah a ni, a ti bawk.

Chief Minister Pu Lalduhoma pawhin thu sawiin, vawiin hi Mizoram tana ni chhinchhiahtlak leh hriatreng tawh tur a ni a. Prime Minister Pu Narendra Modi-an a hmun ngeia kala min rawn hawnsak hian, Mizoram leh hmarchhak bial tana a inpekzia a tilang a ni. Rel kawng thar leh rel service tharte hian India ram laili nen inpawhna thuk zawk min siamsak dawn a, sum leh paiah hma kan sawn pui hle ang. India ramah huapzo takin hmasawnna hna kalpui a nihzia a tilang bawk. Vawiina min hawnsak zirna in pahnih leh a lung min phumsak hmasawnna hna thar parukte pawh hi Mizoram mamawh em em, kawng tam taka kan tangkaipui turte an ni. Mizoram hmasawnna tur thil kan sawi apiang hi Prime Minister hian inhawng takin min ngaihthlaksak thin a, a chungah hian kan lawm thin hle.

Railways Minister Pu Ashwini Vaishnaw, he rel kawng a puitlin theih nana theihtawp min chhuahpui rengtu chungah pawh kan lawm a, a hming hi kan hrereng tawh ang. Tlangrama rel kawng, leiverh leh leihlawn tam tak awmna sial hi thil awlsam a ni lo va, hnathawh ropui bik a tling a ni. He hna ropui tak thawktu Railway Board, Engineer leh workers te an chhuanawm hle.

Chutihrualin, August 2023 a he rel kawng siam laia vanduaina tawka nunna chan ta kan thiante kha kan hrereng a, a pawi kan la tibang thei lova, an chhungte kan tawrhpui takzet a ni, a ti.

Railways Minister Pu Ashwini Vaishnaw chuan kal khawmte lawmna thu a sawi a. Mizoram a lawmpui a, he project hi a awlsam lo hle a, leiverh 45 leh lei lian 55 zet a awm a. Lei ban sang ber phei chu Delhi-a Qutub Minar ai pawhin a sang zawk a ni. Khualzin tan awlsamna tam tak a thlen dawn a, Cargo Service Train pawh kan Service tir nghal ang a, kan thlai tharte awlsam takin state pawnah kan phur chhuak zung zung thei tawh dawn a ni. Hei hian Prime Minister Pu Narendra Modi kaihhruaiin hmarchhak bial tana a hmathlir (Act East) a tihhlawhtlinna a ni, a ti a. Hmarchhaka Railways service lama hmalakna dangte pawh a tarlang a ni.

Prime Minister hi zing lamah Lengpuiah a rawn tum a, Lengpuiah hian Pu K. Sapdanga, Home Minister leh officials ten an lo hmuak a. Lengpui atangin Helicopter-in Thuampuiah a rawn tum leh tura tih ni mahse khaw chhia vangin thulh a ni a, Lengpui Airport atangin Video Conference hmangin thu a sawi ta zawk a. A lawmnapui ber Lammualah hian Mizoram Governor Gen. (Dr) VK Singh, PVSM, AVSM, YSM (Rtd), Chief Minister Pu Lalduhoma, Pu Ashwini Vaishnaw, Railways Minister leh mipui tam tham takin hun an hmang a ni.

Prime Minister Shri Narendra Modi-a'n a vai liam tak, Rajdhani Express rel chu Sairang-Bairabi Railway Line-ah a tlan tan ta.

Prime Minister Shri Narendra Modi chuan he'ng rel service-te hi a vailiam:

Sairang - New Delhi (Rajdhani Express)

Sairang - Kolkata

Sairang - Guwahati