Mizo dam lai zinga upa ber Pi Buangi

Aizawl | Sept 13, 2025: Social Welfare Minister Lalrinpuii chuan vawiin tlai khan Aijal Club-ah Pi Buangi chu Mizo damlai zinga upa ber a nih thu a puang.

Pi Buangi hi kum 1917, April ni 23 khan Aizawl Venghnuaiah a lo piang a. Mizorama The Salvation Army-a Kohhran Upa ber Pu Thangchhunga fanu niin, a pa hian a pianni leh kum te a diary ah ziakin a lo vawnsak a ni.

Minister Pi Lalrinpuii chuan Mizo damlai zinga upa ber chu a lawmpui tih sawiin; kum upa te ngaihsak kawnga Mizo khawtlang inawpna fel tak nei kan nihna chu khawvel huap pawha chhuantham a ni tih a sawi.

He hunah hian Chief Minister hlui Pu Zoramthanga, Central YMA President Pu Lalhmachhuana, Aizawl Mihlun Thlahte Chairman Pu K. Liantlinga leh Foundation For Drug-Free Mizoram President Tv. Mathara te'n thu an sawi.

Vawiina Aijal Club-a Pi Buangi puala hun buatsaihah Minister Pi Lalrinpuii chuan zirchianna neih hnu a Mizo zinga upa ber nihna a chang thei chu a lawmpui thu Pi Buangi chu a hrilh a. Social Welfare Department chu Sawrkar Department-ah chuan kum upa te lam changtu Department a nih thu leh, tar leh upate pension kan pek thin mai bakah kum tin Upate Ni a hman thin thu te a sawi a. Upate tana Home te, Day Care Centre han siam belh a nih theih nan sawrkar laipuiah thlen a nih tawh thu a sawi bawk.

Minister chuan khawvel changkang zelah Mizoram ah ngei pawh upa an lo tam belh zel thu a sawi a. Social Welfare Department in a chhut dan chuan kum upa te hi Mizoramah 70,000 chuang awm in, kum 2036 ah chuan nuai 1 an tlin ve tawh rin a nih thu a sawi a. Mizo-te chuan "Aia upa zah hi kan hnam nunphung thurochhiah pawimawh tak, Mizo te min ti Mizo lehzualtu a ni tih te pawh hre thar ila " tiin kalkhawmte a chah a ni.

Pi Buangi (Lalneihsangi) hian April ni 14, 2025 (Thawhtanni) khan kum 108 a tling a, kum 109 a hmang mek a ni. Amah hi Aizawl Venghnuai a piang leh seilian niin; an chhungkua hi Salvation Army zawm hmasate zinga mi niin; a pa chu Thangchhunga CSM, Mizorama (Kohhran Upa) Corps Sergeant Major hmasa ber a ni. Pi Buangi hi Mizo zinga Rehab a thawk hmasa te zinga mi niin, Behala Girls Home Kolkata a hmeichhe rahbi tleu leh fahrah te enkawina hmunah a thawk tawh thin a. Kum 2022 khan Heritage Award buatsaih Mizo Hmeichhe Chhuanawm "Women of Substance" hlan a lo ni tawh ni.