ENGKIM HI A CHI ATANGA LO INTAN A NI

  Nun Atana Hmanrawn Bawm

- Rick Warren

- Sep15, 2025

“Zingah i chi tuh la, tlaiah i kut sum suh; i hre si lo, a thang tha tur khawi nge, hei hi nge, kha kha nge, an tha ve ve dawn” Thuhriltu 11:6

I nuna engkim chi chi tuh atanga intan a ni. Thil chi - hrang hrang a awm, chi tha deuh entirnan ngilneihna, hmangaihna, rinna leh zahawmna te. Thil chi tha lo deuhte pawh an awm a entirnan mi selna leh duhamnate hi.

Thlai chi hi han ngaihtuah teh. Thlai chi i thlak hun leh a seng hun inkar a awm ngei ngei thin. Thalah i thlak chuan furah i thar thin ang hian. Tomato i chin hian darkar khat hnuah i thar nghal mai lo. I nghah a ngai a ni.

Chutiang chiah chu hringnun pawh a ni. Inlaichinnaah ngilneihna chi i tuh anih pawhin, ngilneihna chu i thar nghal kher lo vang. Rinnain tuh la, Pathianin chu a thantirtu atan ring la, nghak ang che.

Thuhriltu chuan, “Engkim tan hian hun ruat a awm a, Van hnuaia thiltih zawng zawng tan hun remchang a awm … Phun hun a awm a, thil phun phawi hun a awm … Lung paih darh hun a awm a, lung lak khawm hun a awm” Thuhriltu 3:1-2, 5

Pathian i nghah hian engtin nge i awm thin - thlai chi i thlak rual rual hian seng nghal mai i tum em ni? I seng duh thil chi chu tuh nawn tuh nawn ang che. 

Bible chuan, “Zingah i chi tuh la, tlaiah i kut sum suh; i hre si lo, a thang tha tur khawi nge, hei hi nge, kha kha nge, an tha ve ve dawn” Thuhriltu 11:6

I nunah thlai seng tur rei fe i nghak thin em? Pathian Thu innghahna tur ka pe ang che. 

Habakkuka bung 2 ah chuan Pathianin, “A kin ni chu a hnai tial tial a, a thlawn lo vang. Rei deuh mahse, nghak rawh; a lo thlen ngei dawn avangin a tlai chuang lo vang” Habakkuka 2:3

Rah seng hun chu a muang deuh anih pawhin, Pathian chuan, a hun takah a ni ang a ti. Nghak zel la. Pathianah innghat la, chi tha tuh thin ang che. Pathianin a than tir ang a, engtikah emaw chuan a rah i seng dawn a ni.  

Ngaihtuah zui atan

* Engtikah khan nge thlai chi tha lo i tuh a, a tha lo vek i seng kha?

* Engtikah khan nge thlai chi tha i tuh a, a tha vek i seng kha?

* Eng chi nge i tuh a, ila seng si loh awm le?

Rinna thlai chi tuh turin i inpeih em?

Hetiang hian tawngtai ang che:

“Ka Pa, min hmangaih avang leh chatuan hmuna cheng ve tura hun min ruatsak ve avangin ka lawm e. Ka sualnate ka rawn puanga, ka chhandamtu i ni tih ka ring e. Ka sualnate ka puana nang ka rin che chuan ka him ang tih min tiama. Chhandamna chu khawngaihna avangin rinna kaltlanga kan neih a ni a thildang vang a niilo i tih avangin ka ring che a ni. Ka nunah hian Lal ni turin ka pawm ta che. Vawiinah hian i hnung zui ka duh a, ti tura min tih apiang chu ti turin ka inpeih e. Ka nunna i hnenah ka hlana, min chhanddam tur leh i angchhunga min pawm ve turin ka ngen a che. Isua hmingin ka dil e. Amen.”    

Isua pawm tura i tawngtai thei anih chuan, he email ah hian min lo hriattir la, min lo bia ang che Rick@PastorRick.com. Isua nena zinkawng i zawh tanna tura thil pawimawn a thlawnin ka pe dawn che nia.  

[Lettu: Sangpuia]