LESDE Mizo Idol Season 8 endiktu turte a hriat ta

Aizawl | Sept 16, 2025: LESDE Mizo Idol Season 8 intihsiakna neih meka endiktu turte a hriat ta a, Judge thar pathum-in intihsiakna an endik dawn.

Zonet chuan LESDE Mizo Idol Season 8 Judge tur hi vawiin khan a puang a, chungte chu zai leh rimawi bakah hlaphuah lama tawnhriat ngah tak K. Hminga te, zaithiam lar Jaui leh Mizo Idol Season hmasa bera pathumna Hmingtea te an ni a, an ni pathum hian kar leh Thawhlehni, September ni 23, zan dar 8 a 1st Round intihsiakna tan tur chu an endik nghal dawn a ni.

Zonet buatsaih LESDE Mizo Idol Season 8 neih mekah hian Application form lak chhuah ngai lovin, Virtual Audition hmangin Augsut ni 15 atang khan mahni zai lai video theh luh theih a ni a, video theh luh theih hun tawp August ni 31 thleng khan mi 716-in an zai lai video an theh lut a, heng video luhte hi endik a nih hnuah tun thla ni 9 zan khan Audition result hi puan niin, mi 105 in First Round an lut a. Heng hian tun thla ni 23, zan dar 8 atangin 1st Round intihsiakna an tan a ni dawn a, intihsiakna hi Zonet Studio atangin Live-a pek chhuah thin a ni dawn a ni. 1st Round intihsiaknaah hian Contestant-te hman turin Guitar leh Keyboard chhawp a ni dawn a, 1st Round intihsiakna hi September ni 26-a zawh tura ruahman niin, Top 50 thlan chhuah a ni dawn a, heng mite hian intihsiakna an hmachhawn hunah top 20 thlan chhuah leh tura ruahman a ni a. Intihsiakna hi top 10 atangin Mualpui-a R. Dengthuam Hall-ah neih a ni dawn a, Live Music hmanga intihsiakna hi neih tura ruahman a ni.

Mizo Idol Season 8-a pakhatna chuan cheng nuai 2 a dawn dawn bakah LBS Suzuki-in Scooty an pe dawn a, pahnihin cheng nuai 1 leh pathumnain cheng sing 5 an dawng dawn a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]