ISUA ANGIN NUNG RAWH: MIDANG NGAIHSAK, THENRUAL PAWL LEH THILPHALNA KAWNGAH

  I Khawthlir Dan Thlak

-    Rick Warren

-    Sep 1, 2025

“Tih tak meuhvin ka hrilh a che u, heng ka unau te berte zinga mi pakhat chunga in tih chu ka chunga ti in ni’ … Heng mi te ber zinga mi pakhat chunga in ti lo chu ka chunga ti lo in ni”  Matthaia 25:40, 45.

 

He khawvela Isua a lenlai khan, mi chi hrang hrang a hmachhawn thin a, a then hrawn nuam deuh te, a then a harsa deuh te an ni hlawm a ni. Engangmi pawh nise, Isua khan midang a ngaihsakna, thenrual a kawm thiam a, a thilphal a ni. Amah zuitu i nih chuan, chutianga i awm ve chu a ngai a ni.

Midang ngaihsak rawh. Midang ngaihsakna chu ataka hmangaihna lantirna a ni. Kut leh ke hmanga hmangaihna lantirna a ni. Mi zawng zawng chungah Isuan a thatna a lantir a! Amah zuitute pawhin ti ve se tih a duh a ni.

Vawiinah chuan inngaihsaktawnna chu a bo dawn ta mai. Miten midang ngaihsak dan pawh an thiam ta lo. Inkungkaihnate pawh a nghet thei lo, mi chungah kan thatna lantir tur pawhin kan inpawh tak tak thei tawh lo a ni.

Bible chuan, “Tih tak meuhvin ka hrilh a che u, heng ka unau te berte zinga mi pakhat chunga in tih chu ka chunga ti in ni’ … Heng mi te ber zinga mi pakhat chunga in ti lo chu ka chunga ti lo in ni”  Matthaia 25:40, 45. Isuan midang kan ngaihsak hian amah kan ngaihsak zia kan lantir a ni a ti. 

Thenrual pawl thiamna. Thenrual i ngaihsak anih chuan, i milzawng ni kher lo te pawh i zahder thiam tihna a ni. 

Nimahsela, thenrual pawl duhna te pawh a bo dawn ta mai. Mi kan hawihhawm lo tulh tulha, mi kan nunrawng tawh hle a. Midang nena kan inrem theilo a nih pawhin inkawm hlim tal hi chu kan tum tur a ni.

 

Isuan, “Remna siamtute chu an eng a thawl e; Pathian faa vuahin an la awm dawn si a” Matthaia 5:9. Pathian fate chuan buaina an siam tur a ni lo; remna siamtu anni zawk tur a ni.

Matthaia 7:12 ah Isuan, “Chutichuan, thil engkim miin in chunga an tiha in duh tur ang apiang chu, mi chungah pawh ti ve rawh u.” Hei hi Dan Rangkachak tiin kan sawi thin, thenrual pawlnaah a pawimawh hle a ni. I chungah mi an tha lo vin, an bei che anih pawhin, i chungah an tiha i duh tur ang chiahin an chungah ti rawh.

Thilphal rawh. Ngaihdamna, zahngaihna, lainatna, khawngaihna leh duhsakna te hi thilphal kan tih hian a huam vek a - mi chunga hmangaihna lantirna a ni.

Miin tha lo taka an tih che hian, i chunga tha ber nge tha lo ber an lo phawrh chhuah le? Pathian chuan tha takin ti rawh u min ti. Ngaidam la. Khawngaihna lantir ang che. Engnge an paltlang i hre si lo.  

Isuan, “Sawisel suh u, chutichuan sawiselin in awm lovang; tumah thiam lovah ruat suh u, chutichuan thiam lohvin in awm lo vang; ngaidam rawh u, chutichuan ngaihdamin in awm ang.” Luka 6:37. Kristian tan chuan midang sawisel ai chuan hmangaih hun a ni tawh zawk a ni. 

Bible chuan, “Pathianin khawvel a hmangaih em em a,” a ti.  Johana 3:16. Pathianin mihring a hmangaih a, nang pawh hmangaih ve turin a duh che a ni. Hmun hrang hrangah kan rindan leh ngaihdan a inanglo thluah a. I ngaihdan pawmpui theilo tu che kha i hmelma a ni ngawt lo. I rawngbawlna turte an ni zawk. Anmahni avang khan Isua a thi a ni. 

Isuan a enkawl ang hian - ngaihsak la, kawm thiam la, thilphal ang che.  

Ngaihtuah zui atan

* Midang ngaihsakna i neih theihna turin Pathian nen inzawmna engnge in neih le? I neih loh chuan, i engnge thlak danglam ngai?

* I nunah i mil theih loh zawng an awm em? Engtin nge in insawirem theih ang?

* Vawiinah hian tunge i thilphalna mamawh? Nangmah dotu che, nimahsela nangmaha Isua hmangaihna tawp theilo hmuh mamawh tho bawk si hriat i nei em?

[Lettu: Sangpuia]