INDONA I TELVE LOHNA CHU ENGTIN NGE I KAL LIAM TIR ANG

_Harsatna Paltlang Tura Pathian Dil_

- Rick Warren

- Sep 23, 2025

“Indona chu nangni indona a ni lo va, Pathian indona a ni zawk si a.” 2 Chronicles 20:15

Thawhtheihnaah chuangin thlawk chhuak mai tur ni ta ula. Thlawhna chu thlawk chhuak tura a tlan mek lai chuan, i ban phar chhuakin vai ve vak vak ta la. Thlawhna chu boruakah a thlawk kang a, tichuan nang pawhin i ban chu a hma aia chakin i lo vai a. Nakinah chuan thlawhnaa thawk chu lo kalin, “Engnge i tih?” a ti che a.

Nang chuan, “Thlawhna a thlawh chhuah theih nan ka pui” ilo ti a.

A va nuizatthlak em, a ni lo vem ni? Anihna takah chuan Pathian chauhin a tih theih thilah i inrawlh thin a ni. Thlawhna chu a thlawhchhuah theihnan i puihna a mamawh lo va, chutiang chiah chuan Pathian pawhin i puihna a mamawh hran lo. 

Engvangin nge chau chhe tak leh beidawng taka i awm fo thin? A chhan ni thei a lang chu, Lalpa indonaah inrawlh i tum thin vang a ni, Pathian i ni si lo va. 

“Indona chu nangni indona a ni lo va, Pathian indona a ni zawk si a.” 2 Chronicles 20:15

Miin harsatna an tawh hian anmahni chauha awm an duh thin a. Anmahnin chingfel thei ah an inngai a, keima chungchang a nia, ka kutah awm rawh se tiin an inngaihtuah thin a ni. Nimahsela Pathian dinhmun atanga thlir chuan, nangmah leh nangmah chuan i buaina chu i chingfel thei dawn lo tih a lang reng mai a ni.

Nangma mimal nun emaw in nupa inkar emaw, in sikul chungchang emaw, sum leh pai thil leh kan khawvel thil hrim hrimah emaw pawh hian buaina i nei maithei a ni. Nangma theihna hmangin chinfel i tum a. Nangmah maiin indona chu hmachhawn i tum a, i chau der a ni.

I chakna i hmanga i thei si lo va, i beidawng ta der a, Pathian chuan a hnena kir turin a duh che a ni. A hnen lam i hawi chuan thil chu i tihbuai nuaih avangin Pathian chu hnual rawih turah i ngai maithei e. Nimahsela, Pathian chuan a ti hnual lo vang che, amah chauhin a tihtheih chu nangmah mai chuan i tih theih a ring lo hrim hrim a ni.

Hei hi thudik chu a ni, i kutah khan Pathian a awm lo va; Pathian kutah i awm zawk a ni. I kutah Pathian a awm nia i ngaih chuan, chu chu Pathian a ni lo vang. Milem pathian a ni ang. I thunun theih thil i rin chuan, chu thil chu Pathian a ni lo vang.

Chuvang chuan thlahthlam daih la, Pathian hnenah inpe zawk rawh. Chumi hnuah chuan Pathianin, “A ropui lutuk! Tunah chuan thil kan ti dun thei dawn ta,” a ti ang. 

Ngaihtuah zui atan

* Eng thil nge hun rei tawh tak atanga nangmah maia i tih tum thil awm le?

* Engvangin nge Pathianin a chet hmain inhlan hmasa turin a duh che le? Amah leh nangma chungchang chu engnge hrethiam tura a duh che le?

* I thil tum i tihtheihloh hnuah pawh Pathian chu i lakah a hnual chuang lo tih i hriat hian nagmahah engtin nge a thawh?

*I nun chu Pathian hnenah i hlan tawh em?*

Pathian chhungtea telve tura sawmna chu engtiklai pawhin a awm reng a, a nghak reng che a ni. Ring la lo dawngsawng tawp mai rawh. Hetiang hian tawngtai ang che:

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

 

“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamtu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

 

Isua pawma i ṭawngṭai zo chiah a nih chuan he mail Rick@PastorRick.com - ah hian min lo bia ang che. Isua nen in zin kawng atana thuziak pawimawh tak tak lo thawn che ka duh e

*[Lettu: Sangpuia]*