I THINLUNG DUHZAWNG DILA ṬAWNGṬAINA

_Harsatna Paltlang Tura Pathian Dil_

- Rick Warren

- Sep 30, 2025

“Lalpa chungah chuan lawm bawk rawh; tichuan i thinlung duhzawngte chu a pe ang che.” Sam 37:4

I tawngtai fo chuan thinlung taka i duhna a fiah tihna a ni. Tawngtaina hmanga dilchhuak tur chuan, i tawngtaina chu a than chhoh zel a pawimawh a, i duh tak tak a ni tih a lan chhoh zel a pawimawh a ni.

Tu te pawh hian thinlunga duh kan nei theuh mai. Pathianin duhna thinlung nei tura a siam che vang a ni. Pathian thilpek zawng zawngte hi an tha vek a, nimahsela duhzawngte pawh chu a hmansual theih a ni. Mei pawh hia a awmna tura a alh chuan tha tak a ni, nimahsela a awmna a dik loh chuan in a ti kang thei a ni.

Nangmahah khan duhzawng tha tak tak a awm hlawm a, a tha lo pawh a awm tho a ni. Duhzawng mawi leh mawi chiah lo te, tangkai tak leh tangkai lem lo te, midang tana tha leh tha lo te a awm vek a ni. I tawngtai i tawngtai khan, i thinlung duhzawngte chu thlitfim  niin, Pathianin i tana tha tur leh tha lo tur a hmuh tir thin che a ni.

I tawngtai fona chuan i duh tak tak leh tak tak lohte a hriatthiam tir che a ni. Pathian hnenah vawi khat chauh i dil chuan, chu chu duhna tak tak a ni lo. Duhna pawnlang tak a ni. Pathian chu i duhzawng zawng zawngah chuan a inrawlhlo a ni. Vana awm i Pa a nih angin, thinlung taka i duhna chu a ngai pawimawh a ni. 

Diktak chuan Pathian chuan thinlung zawng zawnga i duh chu pek che a chak a ni. Chutihrual chuan chiangtaka hre tura a duh che chu, amah chu i thinlunga i duh hmasak ber tur a ni a, a dawttu ah a bak zawng chu an awm tur a ni. I tawngtai tam poh leh Pathian lamah leh a duh zawng lamah i thinlung chu awn tulh tulh rawh se. Tichuan Pathian duhzawng chu i duhzawng a ni ang a, i thinlungah a awm hmasa ber tawh ang. An nun kawng engkima Pathian duhzawng ngaihtuahtu a mite tan chuan Pathian hian tih duh loh a nei awm lo ve.  

   

Bible chuan, “Lalpa chungah chuan lawm bawk rawh; tichuan i thinlung duhzawngte chu a pe ang che.” Sam 37:4

Pathian chu rilru tha lo tak pu a ni lo va. I duhzawng i dil a nghak a ni! Lalpa chungah chuan lawm la. A lamah chuan i rilru pe rawh. I tawngtai tam poh leh pawnlang taka i duh te chu thliarfel a lo ni ang a, i thinlung duhzawng tak tak chu i hrefiah thei ang.

Ngaihtuah zui atan

* Thil dila i tawngtainaah chhanna i hmu lo va, mahse tunah chuan duhna pawnlang tak a ni tih i hrechhuak em? Pathianin a aiah thildang a pe che em? 

* Eng kawngah te nge Pathianah lawmna i hmuh ang?

* Taima tak leh bang lo va dila i tawngtai theihnan engtin nge i tawngtaina chu i chhut nawn fo theih ang?

*Pathianin i nun tidanglam se i duh em?* 

Hetiang hian tawngtai ang che: “Lalpa duhtak, ka Lalpa leh Chhandamtu atan Isua hi ka pawm e. Ka sualnate ka puang a, i ngaihdamna ka dil e. Isuan ka sualna zawng zawng a la bo turin a thi a, ni thum niah i kai tho a ni tih ka ring a. Vawiinah atang hian Isua chu Lal leh Chhandamtua pawma a hnungzui ka duh a ni. Ka kawng hruai la, i duhzawng ti turin min pui ang che. Isua hmingin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawhtanna atana pawimawh te a thlawnin ka lo thawn ang che.

*[Lettu: Sangpuia]*