thingtlang khaw 69 Library-a dah tur lehkhabu vailiam

Aizawl | Sept 30, 2025: Vawiin khan Rural Development & Administration Department Minister Prof. Lalnilawma chuan, thingtlang khaw hrang hranga Library sakna tur atana hmalakna ‘Establishment of New Library in Mizoram Project’ hnuaiah Library-a dah tur lehkhabute a vailiam. Lehkhabu vailiamna hun hi DRDO, Aizawl Office kawtah buatsaih niin Rural Development & Administration Department Commissioner & Secretary R Zarzosanga'n a kaihruai a ni.

Minister chuan thu sawiin he project hi Special Assistance to States for Capital Investment (SASCI) Part-VII hnuaia thingtlang khuate tihhmasawnna tura hmalakna pawimawh tak pakhat a nih thu a sawi a. Mizoram Chief Minister hmalakna zarah Ministry of Finance, Govt. of India atanga hmuh niin Mizoram khaw hrang hrang, hmun 273-a Library sak tura ruahman a nih thu leh a buaipuitu, Nodal Department ni tura Rural Development & Administration Department chu ruat a nih thu a sawi a. Thalai leh naupang zawkten finna leh thiamna an chharchhuah theihna tura hmalakna a nih thu sawiin tunlai khawvel mila inherrem chhoh zel a pawimawh thu a sawi bawk.

Establishment of New Library in Mizoram Project hnuaiah hian Library Building 229 sak thar niin, building awm sa 44-te thawmthat an ni tawh bawk a. Bungraw chi hrang hrang heng - Bookshelves, Reading Tables, Chairs, Computer Set with UPS, Librarian Desk, 3-in-1 Printer, LED TV with two way Communication, Internet Connection, 3KVA Power back-up with battery stand, Low height rack for Children te hi dah tura ruahman a ni bawk. Lehkhabute hi National Book Trush (NBT) leh Open Market atangtea lei tur niin, a vaiin 2,81,190 lei tura ruahman a ni a, Library pakhat zelin NBT atanga lei lehkhabu 1,030 leh Open Market atanga lei 358 theuh an dawng dawn a ni.

A thawhkhatna atan, vawiina vailiam tak lehkhabute hi Mizoram khaw hrang hrang 69-ahte semdarh phawt an ni dawn a ni.