Home Minister K Sapdanga leh IPS tling tharte inkawm

Aizawl | September 22, 2025: Home Minister K Sapdanga chuan vawiin tlai khan a pisa-ah tun hnaia Mizo IPS tling thar mi panga - Zosangliana, J Lalthafamkima, Lalthiamsanga Sailo, K Lalremsanga leh Lalringdika te a kawm a, Mizoram Police kal zelna tura thu pawimawh hrang hrang te an sawi.

Home Minister chuan, Tun hnaia IPS kai thar te hi 2015 AGMUT Cadre pek an ni chu a lawmpui thu a sawi a, Mizoram Police hmasawnna tura an theihna zawng zawng hlan turin a chah bawk. IPS tling thar te pawhin IPS mawhphurhna an hmuh atangin rilru thar an put leh zual thu leh, Mizoram Police hmasawnna tur leh tun aia tha zawka a kal zel theihna tura an theihna zawng zawng hlan an inhuam thu an sawi bawk.

Home Minister K Sapdanga chuan, "Mizoram khawi hmunah pawh post pawimawh tak in chelh dawn a, in awmna hmun chu eng hmun pawh nise in awmna apiangah Officer chhuanawm leh rintlak in nih ngei ka beisei tlat a, he ram siam tha tur hian mawhphurhna sang tak in nei a, he ram tana in theihna zawng zawng hmang turin ka beisei tlat che u a ni," a ti.