Aizawl DC atangin Railway Compensation thubuai chungchang sawifiah

Aizawl | September 4, 2025: Bairabi to Sairang Railway Line atan hian Aizawl District ah Sairang leh Sihhmui ram te a paltlang a. Northeast Frontier Railways(NFR) hian Aizawl to Bairabi rail kawng atan hian Rs.340 crore a ruahman a, tunah hian Aizawl District-ah pawh Compensation atana sum min pekchhuah zat chu Rs.523 Crore chuang zet a ni a. Compensation pek nan hian Award pahnih Award No.5 of 2012 leh Award No. 3 of 2019 siam niin mimal ram 128 leh 72 ve ve lak a ni.

Railways Compensation pek zawh a nih hnu hian ram neitu eng emaw zatin Rail Kawngin an ram an paltlang thu leh zangnadawmna pek an nih loh thu Deputy Commissioner hnenah an rawn thlen thin a, a then phei chu Arbitrator leh Court ah te an kal a. Heng thubuai te ching fel tur hian Deputy Commissioner Office atangin team te insiam in 2022 leh 2024 ah te khan survey neih leh niin Railway Compensation pe turin NFR ah Award thawn a ni a, he Award siam belh chungchangah hian vawiin thlengin NFR hian sanction an la siam lova, theih ang tawkin Deputy Commissioner atang chuan nawr reng a ni thin a ni.

Tun hnaiah kil hrang hrang atanga compensation thubuai chingfel tura nawrna an hmuh avangin Deputy Chief Engineer (Civil), NFR hian District Administration tanpuina a rawn dil a. Ni 30.7.2025 khan Deputy Commissioner leh NFR Railways ten joint meeting nei in he meeting ah hian Joint Survey neih a rel a, he survey neih hma hian record leh tul ang ang te in hai that leh niin tun hnu a hriatchhuah ni ta chu, Marked Land Acquisition Plan hi Deputy Commissioner Office kang ah khan a kan tel ve avangin Railway survey record rin mumal tur District Administration hian a neilo a ni.

Tichuan, ni 19.8.2025 atanga ni 1.9.2025 thleng Deputy Commissioner, NF Railway leh Surveyor ten mi 14 te ram endik hna an thawk ta a, chung zingah chuan ram 7 (pasarih) te hi Rail kawng Right of Way ah an ram a lut ngei tih hmuhchhuah a ni a, chutih rualin, midang ram pass 12 (sawmpahnih) te hi an ram pass te endik anih hnu in thutling a pawm a ni lo a ni. He survey team ah hian Deputy Commissioner Office atangin Senior Officer leh Surveyor te an kal bakah Railway aiawh te an kal a, an thil hmuh chhuah te hi Sorkar rawn chungin hmalak chhunzawm tum a Ill.

Aizawl District Administration chuan Bairabi-Sairang Railway line chungchanga compensation thubuai reng reng te hi a theih ang tawkin a lo chingfel thin a, Arbitrator emaw Court thu pawh tha taka hlenchhuak in ram neitu dik tak ten zangnadawmna an hmuh ngei theih nan hma a lo la tawh thin a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]