Aizawl bawrhsap-in mi panga aia tam punkhawm leh bengchhen khap

Aizawl | September 15, 2025: Aizawl bawrhsap Er Lalhriatpuia chuan vawiin khan thuchhuah siamin, “Aizawl District huam chhunga Sawrkar Office (Govt. Institutions) awmna hmun hrang hrang Raj Bhawan, Chief Minister's Office, Mizoram Assembly Secretariat, MINECO etc. leh a chheh velah sawrkar, politics, sakhuana, vantlang leh thil dang eng vang mahin mi 5 (panga) aia tam punkhawm leh bengchhen khap tlat a ni” a ti.

He thuchhuah hi vawiin khan District Magistrate Seal-a nemnghetin hming a ziah hnan a ni.

Tunlai hian Sawrkar lakah thil phut neiin pawl lungawilo, nawrh huaihawt mek an awm thu dawn a ni a. A hnuaia hnathawk ten harsatna an tawh loh hi Sawrkar duh dan ber a ni. Hetiang thil duhawmloh a thlen loh nan leh thlamuang taka Sawrkar hnathawk ten an hna an thawh theih nan Aizawl District mipuite zawm turin thuchhuah siam a lo ngai ta a.

Chuvangin, Er. Lalhriatpuia, District Magistrate, Aizawl District, Aizawl chuan Section 163 of BNSS 2023 in thuneihna a pek angin hetiang hian thupek a chhuah.

“Aizawl District huam chhunga Sawrkar Office (Govt. Institutions) awmna hmun hrang hrang Raj Bhawan, Chief Minister's Office, Mizoram Assembly Secretariat, MINECO etc. leh a chheh velah sawrkar, politics, sakhuana, vantlang leh thil dang eng vang mahin mi 5 (panga) aia tam punkhawm leh bengchhen khap tlat a ni”.

He thupek hi chhuah a nih atangin thia 2 (two months) chhung a huam ang a. He thupek bawhchhia an awm a nih chuan Section 223 of BNS hmangin an chungah action lak a ni ang. Amaherawhchu, hei hian dan leh thupek kengkawhtute erawh a huam lo ang.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]