Tiranga Mahotsav – Tiranga Mela leh Tiranga Concert hawng

Aizawl | August 12, 2025: Vawiin khan Art & Culture Department huaihawtin India khua leh tuiten, ram hmangaihna thuk zawk an neih theihna tur leh India ram hnam puanzarin a entir, hnam hrang hrangte inkara inpumkhatna thuk zawk a awm theih nana duan Tiranga Mahotsav – Tiranga Mela leh Tiranga Concert khuhhawnna Vanapa Hall-ah neih a ni a. Art & Culture Minister C Lalsawivunga'n khuallian niin Mahotsav hi a hawng a, Art & Culture Department Link Secretary Lalmalsawma Pachuau-in hun a kaihruai.

Khuallian chuan thu sawiin India ram zallenna champha vawi 75-na lawmna kalzel puala hun buatsaih, Tiranga Mahotsav hman a ni thei chu lawmawm a tih thu a sawi a. India Flag hnuaiah hnam hrang hrang leh tawng hrang hrangte huang khatah kan luanza thu sawiin India Flag Tricolour-in a entir impumkhatna chu vawng nung theuh tur leh he hmalakna thlawpa ram leh hnam tana intukluhna thinglung nei deuh deuh turin kalkhawmte a fuih a ni.

Tiranga Mahotsav hi Ministry of Culture, Govt. of India-in Har Ghar Tiranga programme a buatsaih hnuaia peng pakhat niin India ramin kum 75 zallenna a neih hriat rengna pualin, kum 2022 atang khan hman tan a ni a. India rama hnam hrang hrangte chu, India Flag hnuaiah zai khatah kan luangza a ni tih lantir nan, India flag chawisang tur leh In-tina India Flag zar tura hmalakna a ni a, chi tin leh hnam tinte inkara inpumkhatna tha a awm theihna tura hmalakna a ni.

Tiranga Mahotsav hnuaiah hian India Flag kenga kawng zawh runpui - Tiranga Yatra te, hnam ro thil hlu leh thar chhuahte phochhuahna - Tiranga Mela te, hnam zai leh lamtea intihhlimna - Tiranga Concert-te neih a ni bawk. Mizoramah pawh hmun hrang hrangah Tiranga Mahotsav hi hman niin a lawmnapui ber hi Vana Pa hall-ah neih a ni a, Mizote kutchhuak thil phochhuahna stall eng emaw zat siam niin zai thiam leh band hrang hrang te, sikul naupangte leh 69th Batch Student, Institute of Music & Fine Arts, Art & Culture Department ten zai leh hnam lam hmuhnawm tak takte an entir bawk a ni. Tiranga Mela hian August 14, 2025 thleng a awh dawn a ni.

Art & Culture Director Carol VLMS Dawngkimi'n lawmthu sawiin Tiranga Mahotsav-Mela & Concert hawnna inkhawm hi a khar a ni.