“THUDIK TLAHNIAM” HI I HRE VE EM?

_I Khawthlir Dan Thlak_

-Rick Warren

Aug 11, 2025

“Thudik in hria ang a, thudik chuan a ti zalen ang che u.”  Johana 8:32 (NIV)

 

Kum engemaw zat kalta atang khan kan nunphung hrim hrimah hian dikna hian hmun a chang tlem tan ta. Kawng engkimah eirukna hmuh tur a awm - politik ah te, sumdawnnaah te, infiamnaah te, zirnaah te leh ennawm lantirnaah te, kohhranah te pawh a ni. Chung atang chuan sawi tur engemaw chen nang pawhin i neih ve ka ring.

Rilru puthmang dik tawk tawh lo hi engnge a chhan ni ang le? Thudik tlahniam tiin kei chuan ka sawi mai a ni.

 

Isuan, “Thudik in hria ang a, thudik chuan a ti zalen ang che u.” Johana 8:32 (NIV). Zalenna chu thudik atangin kan hmu a ni. Thudik i hriat tam poh leh, i thlarau nunah, i mimal leh chhungkua bakah kawng engkimah i zalen ang. Hemi ep chiah pawh hi a dik a: Thudik i kalsan nasat poh leh i zalenna pawh a nep tial tial ang. 

“Thudik tlahniam” tih hi ka thlan chhan chu kan khawtlang nun hi a phawkchhuak chianga ka hriat vang a ni. Zawi muangin, tlem te te in thudik ngaihhlutna hi a tlahniam zel a ni. Tun hmaa thudik kan ngaihhlut ang kha a ni ta lo, kan chenna khawvelah hian zawi muangin thudik ngaihhlutna a tlahniam mek a ni.

I ha ang chiah kha a ni. I ha a mawih tantirh khan i hre miah lo vang. I hmu thei si lo va, engmah a hriat loh a ni. Nimahsela a thleng si a - i tih tawp loh chuan i ha chu ila hloh dawn a ni.

Tun hnai chhuan engemaw atang khan khawtlang innghahna atana thudik kan hman thin kha a insawn ta tlat a ni. Kawng lehlamah chuan, mi tam zawk chuan engnge dik leh dik lo an la thliar hrang thei a. Miin thil diklo an ti anih pawhin a dik tal an la hria a ni. Nimahsela tunlaiah chuan mi tamtak chuan thil dik leh dik lo pawh an thliar hrang thei tawh lo, thil dik leh diklo a awm emaw ni le an ti zawk a ni.

He ngaihdan lo pianna chhan hi postmodernism kan tih vang hi a ni a. Engmah hi dik ber a awm thei lo tih ngaihdan atanga lo piang a ni. Nimahsela chu chu a rintlak lo va, awmzia a nei lo bawk. A eng ber hi nge dik tihah mi kan innghat vek si a.

Damdawi dawrah i kal chuan damdawi lam thiamin damdawi dik tak a lo chawh ang che. Ding rawh tih chhinchhiahna i hmuh chuan i midang pawhin ding turah an ngai vek che a ni. Khawvelah hian miten eng ber hi nge dik tih hi hriat an duh reng a ni.

Postmodernism ah chuan mi ten thudik ai chuan hriatthiamna an nei nasa zawk a ni. Ngaihdan hrang hrang te hi an intluktlang vek a ni. Nimahsela chu chuan awmzia a nei lo. “Thla khi lung atanga siam a ni,” tiin lo sawi ta ila. Nangin, “Thla khi bawnghnute khal atanga siam a ni,” ti ve thung la. An inang thei lo reng reng a ni. Hringnunah hian thil dik chu a dik reng ang a, a diklo pawh chu a diklo reng ang.

Khawvelah hian thudik ngaihthahna a awm zel chuan, i nunah leh hringnunah thudik chu a tlahniam zel ang. Kan hmalamah hian zalen tura Isua thutiam anga i awm theihnan thudik chu engtiangin nge i chelh theih tih kan la zir dawn a ni.

Ngaihtuah zui atan

* In ramah emaw in khawtlang ah emaw “thudik tlahniam” chu engtin nge i hmuh?

* A diklo i vawn reng lai hian “thudik tlahniam” chu nangmahah engtin nge i lo tawnhriat ve tawh le?

* Pathian thudik i pawm hian engtiangin nge zalenna chu i lo tem ve le?

*[Lettu: Sangpuia]*