Social Welfare Minister Lalrinpuii'n Zo Inspiration Foundation Website leh MIS hawng

Aizawl | August 13, 2025: Social Welfare Minister Lalrinpuii chuan vawiin chawhnu khan Hyve Aizawl City Hall-ah Zo Inspiration Foundation (ZIF) buatsaih, Free Education Programme (FEP) Parents Meet cum Website & MIS Launch Programme chu khuallian niin a hmanpui a, Website leh Management Information System (MIS)-te hi hman theih turin a hawng nghal a ni.

Khuallian Lalrinpuii chuan ZIF-te hnathawh chu a ropuiin a chhuanawm, a ti a. A department chan, Social Welfare Department hmalaknate bakah sawrkarin tanpui ngaite tana hamthatna hrang hrang a duante a tarlang a. Mizoram Universal Healthcare Scheme (MUHCS) kaltlangin cheng vaibelchhe 33 chuang hmangin mipuite damdawi in awm man leh an inenkawlna senso an chhawk zangkhai tawh tih leh sawrkar sikulah uniform leh lehkhabu a thlawna sem thin a nih thu a sawi bawk.

Minister chuan ZIF-te chu social / health / education sector-a an hmalaknaah sawrkar hmalakna nena kalkawptir (converge) theih a awm chuan sawrkar chu thawhho a inhuam reng tih sawiin, Lailen Consulting nena thawkhova, inrelbawlna felfai tak nena mi tam zawk an tanpui theihna tur, website https://zoinspiration.org/ leh MIS an siam chu tangkai taka hman a nih theihna turin a hawng a ni.

Hawnna hunah hian School Education Director Angela Zothanpuii, pawhin thu a sawi a. Hun hi Zorinpuii Hlawndo-in kaihruaiin, ZIF Chairman Dr Zoramthanga chuan kalkhawmte lawmna thu a sawi a. Pu Emmanuel Thangrosanga, ZIF Founder & Secy atangin Report leh Introduction ngaihthlak niin, website leh MIS siamsaktu Lailen Consulting-te’n Technical Report an pe a. ZIF Vice Chairman PC Lalngaihawma chuan lawmthu sawiin hun a khar a ni.

ZIF-te chuan chawhma lamah Free Education Programe (FEP) hnuaia zirlai an enkawl mek, mi 47 nu leh pate leh enkawltute nena inkawmhona hun an hmang a. Chawhnu programme-ah hian an thawhpui NGO leh sikul hrang hrang - Ephatha Special School, Special Blind School, Gilead Special School, leh a dangte an tel bawk a ni.