PWD Minister-in Sairang – Kawnpui kawng thawmthat hna mek riakin a vil

Aizawl | August 5, 2025: Sairang–Kawnpui inkar kawng thawmthat hna kalpui mek chu Public Works Department-a tawktute, NHIDCL hnathawkte, Khawtlang hruaitute bakah Minister leh MLA-ten ngawrh takin an vilpui zel a. PWD Minister Vanlalhlana pawhin tum eng emaw zat a hmunah enpui tawhin kawng siam hna hmasawn dan enpuiin leh thawktuten harsatna an neih te chinfel zung zung a nih theih nan, nizan khan riakin a vilpui a ni.

PWD Minister Vanlalhlana chuan Sairang – Kawnpui inkar kawng, lirthei tan a tlan tlaka siam vat a nih theih nan PWD leh NHIDCL-a thawktute nen tangkawpin theihtawp chhuah zel a nih thu a sawi a. Hna sawt zawka kalpui a nih theih nana khawtlang hruaitute inpekna leh pawl hrang hrangte tanrualna chu lawmawm a tih thu a sawi. He kawng zawh a lirthei khalhtu tangkhangte leh harsatna hrang hrang tawk mekte chu, kawng tha kan neih theih nana hmalaknate ngaichang chunga lo dawh hram hram turin a ngen a. Kawng thawmthat hna zawh fel thuai a nih theih nan Sawrkarin lirthei tlan dan a ruahman te ngaih pawimawh a tul thu sawiin hemi kawnga khawtlang hruaitute tawiawmna ah lawmthu a sawi bawk a ni.

PWD Minister hi Engineer-in-Chief Er H Zoramliana, Chief Engineer (Roads) Er. David Sapzova leh Chief Engineer (Highways) Er. Robin Lalrinawma ten an tawiawm a ni.