MSPMC-in Agriculture Growth Centre sak mek endik; nikum-ah hna 22% zo tawh kha, kuminah 20% a ni daih!

Aizawl | August 9, 2025: Mizoram State Project Monitoring Committee (MSPMC) Vice Chairman R Lal Rinawma hovin MSPMC member ten nimin khan, a vawihnih (2)-na atan Agriculture Growth Centre, Tuikual South, Aizawla sak mek chu uluk taka endik a ni a. A hmunah hna tha tak leh chak zawka kalpui dan tur pawh sawiho nghal a ni.

Sorkar thuchhuahin a tarlan danin, "He hna hi M/S North East Consultancy Services (NECS) hnenah ni 27th August, 2025, 2018 khan Restricted Tender hmanga pek a ni a. Contract Agreement amount chu cheng vaibelchhe sawmli pathum (Rs 43.00 Crores) chuang hret a ni a. He hna hi thla sawmthum paruk (36) chhunga thawhzawh tura tih a ni. Ni 8th August, 2025 thlenga hna thawh tawh chu za zelah sawm hnih (20%) vel a ni,"

He hna hi a tirah Agriculture & Farmers’ Welfare Department enkawl a ni a. February, 2025 khan Agriculture & Farmers’ Welfare Department hian Mizoram PWD kutah hlanin, tunah hian hna chak takin kalpui mek a ni.

August 2024 khan, helai hmun hi an tlawh tawh a, sorkar thuchhuah chuan, "A hna hi 22.11.2022 khan tan niin, 07.11.2025 a zawh tura ruahman a ni a, tun dinhmunah hna hi za zela 22 (22%) zawh tawh a ni," tiin a tarlang a, a kum khatnaah an tlawh leh a, 20% a ni ta thung a ni.

Nikum lalam Agriculture Growth Centre chungchanga sorkar thuchhuah:

Aizawl | August 23, 2024: Nimin August ni 22, 2024 khan Mizoram State Project Monitoring Committee (MSPMC) chuan Agriculture Growth Centre, Tuikual South, Aizawl sak mek chu tlawhin hmalaknate an enfiah. MSPMC Team hi Pu R. Lal Rinawma, IRS (Rtd.) Vice Chairman-in a ho a ni.

Agriculture Growth Centre hi NEDP sum cheng vaibelchhe 43 senga sak a ni a, Nodal Deaprtment hi Agricuture & Farmers Welfare Department niin, Constructor hi M/S Northeast Consultancy Services (NECS), Chanmari, Aizawl a ni. A hna hi 22.11.2022 khan tan niin, 07.11.2025 a zawh tura ruahman a ni a, tun dinhmunah hna hi za zela 22 (22%) zawh tawh a ni. MSPMC Team-te hian hna kallai hi uluk taka endikin, chak zawk leh tha zawka hna kalpui dan turte Nodal Department leh Contractor-te hi an sawipui a ni.

MSPMC Vice Chairman hi Er. Lalthanzuala Ralte, Secretary, MSPMC; Arch. George Lalzuia, Member; Pu Lalbiakmawia Khiangte, Member; Dr. K. Vanlaldinpuia, Member leh Pi Vanchhungi, Task Force (MSPMC) te'n an tawiawm a ni.

MSPMC Team-te hi Agriculture & Farmers Welfare Department Director Pu VLT Muana, Jt. Director (P) Pu Tlangtimawia Zote leh EE Er. Lalchhanhima te bakah NECS Manager Pu B. Lalhruaizela te'n an lo dawngsawng a ni.

Aizawl | September 6, 2024: Vawiin chawhnu khan Mizoram State Project Monitoring Committee chuan Construction of Agriculture Growth Centre, Tuikual South, Aizawl chungchangah Planning & Programme Implementation Department Committee Room-ah an Vice Chairman Pu R. Lal Rinawma, IRS (Rtd) kaihhruai in meeting an nei.

Agriculture Growth Centre sak mek hi NEDP sum cheng Vaibelchhe 45.55 senna tur a ni a. Nodal Deaprtment hi Agriculture & Farmers Welfare Department niin, a sa tu hi M/S Northeast Consultancy Services (NECS), Chanmari, Aizawl a ni a. Hna hi 22.11.2022 khan tan a ni a, 07.11.2025 a zawh tura ruahman niin 22% thawh zawh tawh a ni.

MSPMC Team-te hian ni 22.08.2024 khan Agriculture Growth Centre sak hna kal mek chu a hmunah an lo endik tawh a. He inspection-a an thil hmuh atanga siamthat ngaite, bawhzui ngaite leh chak zawka hna a kal theihna tura hmalak dan turte Nodal Department, Agriculture Department te nen MSPMC hian an sawiho a ni.