MLA pahnih TBC-a leh Baryl ten Sairang kawng chhia siam mek an tlawh!

Aizawl | August 9, 2025: Vawiin Dt. 9th August 2025 (Inrinni) hian Aizawl West-I bialtu MLA TBC Lalvenchhunga leh Aizawl South- III Bialtu MLA Baryl Vanneihsangi ten NH-306/06 Sairang - Kawnpui kawng siamthat hna thawh mek an tlawh.

Adviser to CM (Finance& Planning) TBC Lalvenchhunga, MLA chuan, helai kawng chhia avanga lirtheia eizawng ten harsatna an tawk thin chu pawi a tih thu a sawi a, "Chak zawka siamthat hna thawh a nih theih nan lirtheia eizawng pawl ten tlan chawlh an puang chu a lawmawm hle a ni," ti. "Lirtheia eizawng pawl hrang hrang ten tlan chawlh an puan chhungin sorkarin theih tawp chhuahin siamthat hna a thawk mup mup nitin a. Tunah hian duhthusam chu la ni rih lo mah se lirthei tana tlan hrehawm zualpui chu siamthat tawh a ni a, ruahsurin harsatna min thlen belh leh te a nih loh chuan hun reilo te ah dan pangngaiin lirthei an tlan thei thuai turah kan ngai," a ti.

Pu TBC Lalvenchhunga chuan, "Lei a nem a, lirthei rit phur za rualin an zawh reng a nih avang hian siamthat tawh sa pawh zan hnih khatah a chhe leh mai thin a, hetiang hi a nih avangin siamthat hnathawh hi chawl lova thawh reng a ni ang. Chutiang tur chuan hmanrua pawh chhawp belh mek zel a ni a, PWD leh NHIDCL ten an vil zui reng dawn a ni. Nitin mamawh duh anga kan hnianghnar tawk lo pawh sorkarin a hria a, mipuite mangang lo turin a chah. Kan nitin mamawhte pawh dan pangaiin a lo lut thei tan tawh a, lirthei inkal chhawk leh kawng laka indintir te pawh dan pangngai angin an kal thei tawh dawn a ni," a ti bawk.

MLA te hi PWD E-in-C leh hotu dangte bakah, Khamrang leh Kawnpui VCP te leh Lirtheia eizawng pawl hruaitu ten an tawiawm a ni.