Mizorama band nei tha ber school

Mizorama band nei tha ber school - St Paul's HSS

Aizawl | August 14, 2025: MZI Gen. Hqrs. buatsaih Inter High school & Higher Secondary School beat contest chu vawiin khan a hmawr bawk a ni a. Finalist school 12 zingah 31st Avenue, St Paul's HSS, Aizawl pakhatna an ni a. He hun hmanpuitu, Mizo zinga Mt. Everest lawnchhuak hmasaber, AMC Corporator David Zohmangaiha'n lawmman a hlan a ni.

He inelnaah hian Dual Inversion, St Paul's HSS, Aizawl chu pahnihna niin, Holy Diver Band, Govt Mizo HSS, Aizawl te pathumna an ni a.

Vanlalruatsanga, Sainik School, Chhingchhip chu Best Vocalist atan thlan a ni a. Harry Lalruatfela, Dual Invertion, St Paul's HSS, Aizawl chu Best Gitarist a ni. Danny Saingura, 31st Avenue, St Paul's HSS, Aizawl chu Best Bassist atan thlan a ni a, J. Vanlalhruaia, Baptist HSS, Serkawn, Lunglei chu Best Keyboardist atan thlan a ni bawk.

Inter High school & Higher Secondary School beat contest-a pakhatna 31st Avenue, St Paul's HSS, Aizawl hian Rs. 50,000 an dawng a, pahnihna Dual Invertion, St Paul's HSS, Aizawl--in Rs. 30,000 dawngin, pathumna Holy Diver Band, Govt Mizo HSS, Aizawl-in Rs. 20,000 an dawng bawk. Heng bakah hian mimal-a ti tha te leh he inelnaa finalist zawng zawng ten Rs. 1,000 theuh an dawng bawk a ni.

He inelnaah hian district hrang hranga school hrang hrang atangin band 31-in demo an thehluh chu endik a nih hnuah a tha zual band 12 thlan chhuah an ni a. Band 12 thlan chhuah te hi vawiin khan Vanapa Hall, Aizawl-ah inelin, chawhnu lamah lawmman sem zui nghal a ni.

He inelna endiktute hi Mizo musician zinga tha leh langsar ber ber te - HS Lalruatliana (Boom-a); Patea (Magdalene); Samuela (To Coda) leh Rema (To Coda) te an ni a. RK Duhkima leh Nunui Rualhleng ten he inelna final hi an kaihhruai bawk.

He inelnaa-ah hian student ID bakah Permanent Education Number (PEN) nei ngei te chauh tel phalsak an ni.