"Mipui mamawh - buhfai, tuialhthei, gas dinhmun a tha rih hle,"

# "Mizoram buhfai chhekkhawl mek dinhmun pawh a tha a, mipui tan thlaphanna tur a awm lo,"

Aizawl | August 1, 2025: ZPM Media Department chuan vawiin khan Supply Department Office leh Kudam thenkhattean tlawh a; thuchhuah siamin, "Supply Minister B Lalchhanzova leh Department hotute hmalakna avangin mipui mamawh – buhfai, tuialhthei, gas - dinhmun a tha rih hle," an ti.

"Supply Minister B Lalchhanzova’n chak takin hma a la a; Secretariat leh Directorate nen pheikhai rual taka hma lain, mipuiin buhfai, gas leh tuialhthei te an tlakchham loh nan theihtawp an chhuah a, heng mipui mamawh te dinhmun pawh an ngaihven reng a. Hetianga thawhhona tha tak avang hian Mizoram buhfai chhekkhawl mek dinhmun pawh a tha a, mipui tan thlaphanna tur a awm lo," tiin an thuchhuahah hian an tarlang.

Tuna buhfai chhekkhawl mek dinhmun chu hetiang hi a ni:-

Aizawl West DCSO – Quintal 5,778

Aizawl East – Quintal 5,721

Lunglei District – Quintal 37,641

Hnahthial District – Quintal 4,676

Champhai District – Quintal 10,321

Siaha District – Quintal 10,950

Lawngtlai District – Quintal 22,618

Kolasib District – Quintal 18,208

Mamit District – Quintal 18,346

Serchhip District – Quintal 12,949

Saitual District – Quintal 10,535

Khawzawl District – Quintal 5,414

Zuangtui Kudam - Quintal 8,540

Tihian, tun dinhmuna FCS&CA kudama buhfai awm zat chu quintal 1,71,704 a ni.

August, 2025 thla thleng hi Food Security sem vek tawh a ni a; August thla hian Non-Food Security-a mi, card var leh card sen tlem te chauh pek tur a ni tawh. Food Security atang hian Quintal 54798 leh Kg 33 hi thla tin a lak theih a, thla thum quota kha sem lawk a nih avangin August thla thleng hi lak tawh a ni. Open Market Sale Scheme atangin FCI dawr a ni bawk a, vawiin August ni 1, 2025 hian release order dawn theih beisei a ni. Tin, ‘Open Market Procurement’ atangin a remchan dan ang angin buhfai lakkhawm a ni bawk a. Tunah hian Mizoram hmun tinah buhfai dinhmuh a tha rih a ni.

Monsoon Stock hi Phase 3-in tan a ni a; thla 7/8 stock ngai pawh hi February thla atang khan inbuatsaih lawk a ni a. Thla 5 thla 6 ho hi March thlaah, a bak thla 4 te, thla 3 te stock a tul chang a awm a, chu chu May thla khan stock tan a ni. Mizoram dinhmun a that viau chuan thla hnih tal dah khawl chang a awm bawk. Chutiang chu June leh July khan dah khawl nual bawk a ni. A bikin Kolasib hi kawng tha chin deuh hlek a nih avangin eng zat nge an dawn theih tih kudam tin zawhfiah a ni a; Lungdai tlangdung hi a harsa deuh tih lohah chuan an dawn theih zata tam tunah hian dah khawm mek a ni a. December thla thleng daih tur dah khawl vek tawh bawk a ni.

Kawng dinhmunin duhthu a sam lo chungin, Tuialhthei phurtuten theihtawp an chhuah a, an chungah pawh kan lawm hle a ni. Tukin zing report-ah khan, Gas tak hi chu sem chhuah reng a nih avangin stock ang zawng chuan sawi kim vek theih a ni lo a. Petrol leh diesel pawh stock a tha a, free sale theih vek a ni. Nizan (July ni 31, 2025)-a Kawnpui atanga Aizawl pana lirthei lo chho hi 138 a ni a. LPG phur – 25, petrol phur – 19, diesel phur – 23, petrol leh diesel phurh pawlh – 6 an awm a ni. July 26 – August 1 chhunga LPG – trip 82 (bur 27548), diesel – trip 163 (Litre 2596000), petrol – trip 163 a lo lut a. Tuialhthei phurtu Driver fel leh tlawmngai tak takte chungah kan lawm hle a ni. Hetiang hi a nih avangin tukin pawh khan filling station zawng zawng deuhthawah free sale theih niin report kan dawng a ni.

Mizoram sawrkar, Department thawktu te, lirthei neitute leh khalhtute, tlawmngai pawl te, Mizoram Police te, Sairang, Khamrang leh Kawnpui VC te chungah; mipui tana an inpekna zawng zawng avangin ZPM chuan lawmthu an sawi a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]