CM-in Intensified IEC Campaign on HIV a hawng

Aizawl | August 12, 2025: Vawiin khan I & PR Auditorium-ah Chief Minister Lalduhoma'n Intensified IEC Campaign on HIV thawh hnihna leh HIV Test Drive Campaign 2025 chu a hawng. Health Minister Lalrinpuii chu khualzahawm a ni a, Minister B Lalchhanzova pawhin he hun hi a telpui.

Thu a sawinaah Chief Minister chuan, HIV hi kai tawh chuan a tihdamna a awm lova. A laka himna awm chhun chu invên chauh hi a ni. Invêng thiam tûr chuan, a chungchâng kan hriat a ngai a, uar taka kan inzirtir a tul hle. Tin, he natna hi hmun tinah a awm tawh avangin thingtlâng leh hmun kilkhâwr zâwk thleng phâk ngeia hma lâk a ngai.

Mizoram hi HIV/AIDS invên dan awareness nei tha pâwl tak ni a târlan kan ni a. Mahse, HIV kai kan tam viau lawi si. Awareness nei tha, zawm tha si lo state angin kan lang mek. Hmalakna awmze nei, zawm hlawh lehzual awareness kan ngaihtuahchhuah a tul.

Kum 2024-25 sorkar kum chhûnga, HIV kai hmuh chhuah 68.13% hi sex atanga kai an ni tih thawktuten an sawi a, a dawttu chu ruihhlo ti thinte niin kai zawng zawng atanga teh a 29.25% an tling. Kan rama HIV darhna bul zaa 97.38 % hi Sex leh ruihhlo vang a ni.

HIV test-na hmun, ICTC - a counsellor-te sawi dan chuan, HIV kai hmuh chhuahte hian HIV kai dân leh invênna kawng an hre deuh vek – an ti lehzel a. An kai palh thei a ni tih hrereng chunga invenna an hmang duh tlat lo lai hi – kan mutan, ‘change’ kan mamawhna lai a ni.

Ruihhlo kan nghei thei ngang lo a nih pawhin HIV leh zel hi chu kai lo turin inveng ang u. A kai te pawhin midang kaichhawntir hi hlau hliah hliah ang u. Hmeichhe inzuar dawr lo thei lo te pawhin HIV laka invenna hi lo hmang zel teh se. Tin, in-test hi i uar ang u, mahni dinhmun hriat ran hi kan tan leh midangte tan a tha a ni, tiin HIV laka himna tur nia a hriatte a tarlang.

Intensified IEC Campaign neihna tur khawtlang hruaitute chu, thawktute lo thawhpui turin a sawm a. YMA hruaitute pawh khawhar inah te, YMA programme-ah te tam zawka lo sawi tura ngenin, he natna kan rama a darh chhan ber pahnih - sex leh ruihhlo te hi YMA member-te tih atana mawi lo, Kristian thalaiten an tih ve miah loh tur thil ve ve an ni, a ti.

Lalrinpuii pawhin thusawiin, Mizoram chu HIV/AIDS hluar em em na a la ni zel a. Campaign uar zawka kan neih hi a la tul em em a ni. Tin, a darh chhan bul ber hi sex leh ruihhlo ni mah se vanduaina vangin mi fel tak tak te pawhin an kai palh thei. Natna pakhat anga ngai a, kan dinhmun kan inhriat chian vat zel a pawimawh, a ti a. Campaign hlawhtling tak a nih theih nan mipuite thawhpuina a ngen a ni.

A hawnna inkhawm hi Pu H. Lalengmawia, Commissioner & Secretary, H & FW chuan a kaihruai a, Rev. C. Lalhunglianan hunserh hmangin, Dr. Jane Rinsangi Ralte, Project Director, MSACS chuan HIV / AIDS a Mizoram dinhmun tlangpui a tarlang a ni.

Kum 1990 atanga vawiin thlenga Mizorama HIV kai tawh hi mi 32,994 an awm a. Kum 2024-25 chhunga kai thar hi mi 2471 niin an zinga 1602 hi mipa an ni a, hmeichhia 869 an awm a, an zinga 140 hi raipuar an ni. A kai zawng zawng 97% hi chu inven theih a nih thu a tarlang. Mizoram chu India rama HIV/AIDS venna leh enkawlna lam thawk tha ber 5 na a nih mek thu a tarlang bawk.

Intensified IEC Campaign chhung hian district 11 -a khaw 88 tuam chhuah a ni ang a. A tam thei ang ber test neih hman tum a ni bawk.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]