ALAN LALRINAWMA CHANCHIN

ALAN LALRINAWMA CHANCHIN

Alan Lalrinawma hi Andrew Lalsangzuala leh Lalneihzovi te fapa pahnihtea a upa zawk niin, August ni 22, 1993 khân Civil Hospital, Aizawl-ah a piang a, a pu, H Raltawna (L) in a hming a phuah dan heti hian ziakin a dah- “Keini rinawm lovin awm mah ila, Ani chu rinawmin a awm reng a ni; Amah leh amah a inphat thei si lo va” (II Tim. 2:13) He Pathian thu chang hian nausên hming tûr min rawn pe a. Kan Lal hi a Rinawm êm thin a, chuvangin “Lalrinawma” tih tûr a ni e, kan ti ta a ni,” tiin. Alan-a hian pianpui unau pakhat - Alban Lalfakawma a nei.

Alan-a hi a naupan laiin a hrisêlna a pan ve thin hle mai a, pum lamah insawisêlna a nei ve deuh reng thin a, November 1997 khân Civil Hospital, Aizawl-ah a rilphir paih a ni. Heta tang hian a hrisêlna pawh a ziaawm ta viau a ni. Alan-a hi zirna lamah a kal tluang ve viau a, St. Pauls Higher Secondary Schoolah high school a kal a, a school kal lai hian activity chi hrang hrangah a inhmang nasa viau a, zai, debate, science competition etc-ah te telin, hetianga a inhmang viau chung hian HSLC-ah Mizo subject tih lohah chuan Letter hmu vekin, Distinction-ah

a pass ve thei a ni.

HSLC a zawh hnuah Modern School, New Delhi-ah zirna chhunzawmin, Class 12 Arts a zo a, he school-a a kal lai pawh hian activity chi hrang hrangah a inhmang leh viau a, school aiawhin, student exchange programme-ah USA-ah a kal thei hial a ni. Delhi University hnuaiah college kal chhunzawmin, BA (Pol Science) a zo a, chumi hnuah MA (Pol Science) a zo leh bawk.

A college kal lai atang tawhin lâm lamah a inhmang nasa hle tawh a, a lehkha zir zawh hnuah pawh chu lamah chuan a kal zui ta zel a, Mizoram-a lam (dance) kalphung thara rawn chhem alhtu leh rawn chawi nungtu pakhat a ni ta a ni. Alan-ah hian lam zirna “Mizo Dance Camp” dinin, creative director angin a awm zui ta a, heta tanga lam zir chhuak pawh an tam ve tawh hle a ni. Mizoram entertainment khawvelah inhmang zuiin, programme hrang hrangah a tel nasa a, talent show leh intihsiakna hrang hrangah endiktu ah te pawh a tang ve nual tawh bawk a ni.

Kohhran lama a rawngbawlna:

Alan-a hi naupan lai atanga Kohhran bel mi a ni a, St. Mary’s Chruch, Electric Veng-ah lawiin, Kohhran rawngbâwlna pêng hrang hrangah a tangkai hle a ni.

Kohhran Thalai Pawla nihna a lo chelh tawhte chu:

1. Asst. Secretary- St. Mary’s Parish CTP, Electric Veng

2. Member- DCTP Media Sub-Committee

3. Secretary-Branch CTP Music & Culture Sub- Committee

4. Animator- St. Mary’s Church YCS- (2017-present)

5. Asst. Secy- St.Mary’s Branch CTP (2018)

6. Diocesan Team of Student (DTS)- YCS Aizawl Diocese (2010)

St.Mary’s Aw chanchinbu Editor (2017-18) chhûng khân a ni a. St. Mary’s Branch thalaite chu Diocese Cultural Dance Competition-ah Chawnglaizawnah pakhatna leh Cheraw-ah pathumna lawmman a lo lakpui tawh bawk. Tin, Cathedral Branch buatsaih faklam intihsiakah St.Mary’s Parish chu lawmman pakhatna a lakpui bawk a ni.

Diocese level a nihna hrang hrang a chelh tawhte:

1. Male Representative- 2020-2021

2. General Secretary- 2022-2023

3. General Secretary NERYC- 2022-2023

4. Vice President- 2024-2025

5. Regional Youth Adviser & National Exdecutive

Commit tee Member (NEXCO)- 2024-2025

6. General Secretary (NERYC)- 2022-2024

7. Branch- Assistant Secretary (2018); President (2020)

Parish-ah term laklawhah OB inthlâk a ngaih avangin

2018 (Sept thla atangin) Asst. Secretary post a chelh a, 2024-ah St. Mary's Branch Golden Jubilee Organising Committee Chairman a ni bawk.

Kumpuan “THIANGHLIMNA” pual a DCTP-in short clip insiamsiak a buatsaihah St.Mary’s Branch te lawmman pathumna a lakpui a, script writer, cameraman leh editor hna te aman a kawp vek a ni. Kumpuan pual Drama Competition DC|Pin a buatsaihah St.Mary’s Branch te chu pahnihna a nihpui bawk a, Aloysius Weds Joan tih chu ziakin amah vêk hi director a ni nghal bawk a ni. Lâm lama a talent dawn chu rawngbâwlna zauh zel nân a hmang a, thalai tam takin hlawhtlinna, a puihna kaltlang hian an chang mêk a, Catholic Kohhran pawn lamah pawh he rawngbâwl hna hi a kal pui zêl a ni.

Khawtlang rawngbawlna lam:

Alan hi khawtlângah pawh mi tangkai tak niin, YMA-ah pawh mahni phâk ang tawkin a inhmang a, Electric Veng Branch YMA-ah 2022 atangin Branch Committee Member a ni a, Section V-ah 2021 khân Treasurer niin, Culture & Music Sub Committee-ah Secretary (2022), Vice Chairman (2023) leh Chairman (2024) a ni. CleanElectric Veng Chung Secretary (2022-2023) niin, Covid hripui len lai pawh khan volunteer zingah telin, hri kai test velah pawh a vir kual vêl berah tangin, khawtlang tâna mi tangkai tak a ni bawk.

Mizo Dance Camp:

Mi tam zawkin Alan-a kan hriat lârna chu Mizo Dance Camp hi a ni ngei ang. Mizo Dance Camp hi May ni 31, 2014 khân a din tan a, a thian tha tlêm azâwng te bul tanin, class te hawngin zirlaite a la chho tan a, hemi bâkah scholarship audition te siamin member thar kum tin lak thin a ni a, chùngte nên chuan show hrang hrang Zonet, Thazual Award, Fashion Show, MSL Halftime Show, Taekwondo Fight League, Lelte Award, Anthurium Festival, Winter Fest, Youth Fest , Miss Mizoram, G-20 Summit, Guwahati Gupshup Music Award, Coffee Nite leh show hrang hrangah te an lo inlan tawh thin a ni. Competition hrang hrangah Alan-a hian a naute hi Zo Nation hmingin state dangah a telpui thin a, a hmasa ber atan 2016 HHI (Hiphop International) Mumbai a neihah a telpui a, 2018 khân World of Dance India Region Chennai a neihah Best Costume a lakpui tawh bawk a, 2019 PODS (Power of Desi Streets) Mumbai a neih-ah final lûtin, 2020 HHI (Hiphop International)-ah India region Silchar-a neih-ah Final a luhpui tawh bawk a, 2022 Battle Yaa Skills Vol. 4 Bengalore-a neihah Final a luhpui leh bawk a, 2023 PODS Mumbai a neihah semi-final lût lehin, 2024 Beginning Delhi a neihah semi-final luhpuiin, Alcheringa Guwahati-a neihah 1st Runner up dinhmun a hauhpui tawh bawk a ni. Hemi piah lamah hian 'Z Academy' Dance Drama series, ama direct leh produce 2022 a tihchhuah chu ama Youtube Channel ‘Alan Rinawma’ lamah en theihin a dah bawk a ni. MDC-ah hian member 110 awm mêkin, kum tin active member atangin thla 3 chhung 'Team Member of The Month' ni thei chu an duh ber 'Foreign Trip, Pawisa leh Lirthei '-ah an duh a thlantir thin a, a tihhlawhtlinsak ngei ngei thin bawk a ni.

Kum tin MDC Showcase, a naute leh a zirlaite inpholanna hun leh lâm intihsiakna hun a buatsaihsak thin a, phai lam atangin lamthiam dangte chah chhuakin, a phâk ang tawka ropuiin show a huaihawtpui thin a, heng hi Zonet lamahte tihchhuah thin niin YouTube-ah te pawh en tûrin a dah chhuak thin a ni. May ni 31,2024 khan MDC kum 10 tlin champha chu ropui takin Alana hovin an in kawtah hman a lo ni tawh bawk. Heng bâkah hian a nauten lâm piah lama sum an lâk luh ve theih nan tiin Carnival hrang hrang (Zotlang Carnival, College Veng Carnival, Chanmari West Carnival, Venghnuai Carnival, ITI Carnival, BLITZFEST Kawnpui College) leh hmun dang dangah te House of Horror te buatsaih puiin a theih tâwpin a naute hi abuaipui thin a ni.

Faklam:

Rampum Huap Faklam Intihsiak Synod-in a buatsaih hmasak ber, 2015-ah khân Ramthar Veng Presbyterian Kohhran KTP-te Pakhatna a lo nihpui tawh a, hei bâkah hian Faklam hi veng hrang hrangah a lo zirtir tawh bawk a ni.

YouTube Million Views hmasa ber:

Alan-a choreography ‘Despacito’ chu Mizo YouTube channel-a vawi maktaduai en hlawh thei hmasa ber a ni a, hemi hnuah hian video vawi maktaduai en hlawh thei dang pawh a neih belh leh nual a ni.

Alan-a’n chawimawina a dawn tawhte:

Alan-a hian chawimawina chi hrang hrang a dawng ve tawh a, St.Mary’s Youth Award, Branch member tha leh chawimawi tlâkte an pêk thin chu kum 2017 khân a dawng a, YMA Diamond Jubilee Rimawi zân chawimawina leh YMA Ruby Jubilee zirlai ti tha chawimawina te a lo dawng tawh bawk a ni.

Award hrang hrang a dawnte chu hengte hi an ni:

1) International Award for Young People - Gold (2011)

2) Parent/Teacher Association Award, Modern School, N Delhi (2011)

3) St.Pauls HSS, Tlangnuam - Best Boy Award (2008)

4) St.Pauls HSS. Tlangnuam - Best Performer (2007)

5) Lelte Award 2019-Entertainer of the year. 2) Parent / Teacher Association Award, Modern School, New Delhi (2011)

3) St.Pauls HSS, Tlangnuam- Best Boy Award (2008)

4) St.Pauls HSS, Tlangnuam- Best Performer (2007)

5) Lelte Award 2019 - Entertainer of the year.

A nat dan:

Alan-a hi October 2024 khân a nuamsam lo tan a, doctor-te râwnin, in lamah an inenkawl a, mahse, hma a sawn hleihtheih loh avanginEbenezer Hospital-ah an inentir leh a, heath hian Ril TB a nei tih an lo hre chhuak a, damdawi inah awm zui

nghalin, ICU-ah te enkawl ngaiin a awm a, 2024 Krismas leh Kumthar pawh damdawi inah hmangin, kumin January thla tawp lam khân mahni in lama inenkawl chhunzawm turin a rawn chhuak ta a ni. Damdawi in atanga a chhuah hnu hian hma a sawn ve hret hret a, mahse, Kristian Thalai Pawl Ram Pum Huap Faklam Intihsiak, Ramthar Presbyterian Kohhran-in an buatsaihah pawh a taksa a la chak lutuk lo chungin Chief Judgeah a tang thei a, amah pawhin nuam a ti hle a ni.

Alan-a hian hma a sâwn zêl dâwn emaw tih laiin July ni 23, 2025 khân zing kârah khawsik kaih ang deuhin a awm thut a, nikhaw hre loin a awm zui a, Ebenezer Hospital-ah bawk luh pui leh nghâl a ni a, HDU-ah enkawl a ni a, ni thum hnuah rawn harh chhuakin, HDU atangin cabin-ah sawn luh a ni a, hma a sâwn zêl dâwn emaw tih laiin August ni 3, 2025 zingah khân nikhaw hre lovin a rawn awm leh a, ICU-ah dah luh niin, doctor leh nurse-ten theih tâwp chhuahin an enkawl a, mahse, that lam a pan hleithei ta lo a, August ni 5, 2025, zan dar 8:20 khân a rawng a bawl thin Lalpan a hnêna chawl turin a lo hruai ta a ni.

Lawm thusawina: Kan chhiat tawhna kârah hian lawm thu sawina tûr kan va ngah êm! Kan fapa Alan-a damloh chungchangah Ebenezer Hospital-a thawktu zawng zawngten theih tâwp chhuaha min enkawlnaah lâwm thu kan sawi a. A natna a khirh hle a ni tih hriain Father-ten sacrament te pein an tlawh fo thin a, anni chungah pawh kan lâwm takzet a. Kohhran mipui leh mi mal tam tak, Pathian hnenah min dilpui thintute chungah pawh kan lâwm êm êm a. Tûnah hetia a lo tlin loh tâkah pawh hian, thenawm khawveng, khawtlang nu leh pa, nula leh tlangval, YMA member-te min tawiâwmna zawng zawngah hian “Kan lawm tak zet a ni,” tih mai loh chu sawi tûr a va vâng êm. Nizan lama kan khawhar hlauva min zai tlaivarpuitute kha an zai thiamin min va thlamuan tehrêng êm; an chunga kan lâwmna kan sawi sêng lo. Tin, hei vawiinah a hun hnuhnung, amah thlahna in lam

leh Biak in lamah mi heti zozai, veng chhung leh veng pawh atangte pawhin, khaw nuam lo tak hnuaiah in lo kal khawm a, min rawn thlah liampui te hi ropui kan ti a; kan lâwm tak zet zet a ni. Min lainatna leh min tawrhpuina leh kan chunga in thatna zawng zawng hi a lêt tam takin Lalpa malsâwmnain rûl che u rawh se tih hi kan chhungkaw tawngtaina a ni e.

~ Andrew Lalsangzuala & Lalneihzovi

Electric Veng, Aizawl