Marpara | July 8, 2025: Vawiin ni 8 July, 2025 (Thawhlehni) hian Marpara North-ah ZPM General Headquarters Vice President C Lalnunnema'n MNF leh Congress atangin mi thar 205 zet ZPM ah lawm takin a lawm lut.
Lawmluhna hunah hian C Lalnunnema chuan thusawiin, “ZPM hian chi bil leh hnam bil a thliar lo va, mi zawng zawng huap party a ni. Hnam inpumkhatna hi kan ngai pawimawh a, mipui sawrkar a nih avangin ram leh hnam hmasawnna hi kan ngai pawimawh em em a ni,” a ti a. “Kuthnathawktuten an thawhrim rah an seng theihna turin thlai thar lei tur te siamin; kuminah pawh kan sawi ang ngeiin kan lei thei a, ‘kan ti ang’ kan tih chu kan ti zel a ni. Mipui tan ‘Health Care Scheme’ tha tak mai ‘Mizoram Universal Health Care Scheme’ kan duang chhuak a, Private Hospital engemaw zatin an zawm tawh a. Sawrkarin mipui tana hamthatna a ruahmante a tihlawhtlingtu leh a zar zotu ni turin mipuite pawh kan inbuatsaih ve a ngai a ni. Mizoramah Kalphung Thar Mipui Sawrkar hmel kan hmu chho zel a, ei leh bar bakah inkalpawhna kawng tha te, zirna leh mipui hriselna lamah te hma chak takin kan la mek a, a hlawhtlinna pawh kan hmu zel a ni. Hetianga chak taka hma kan lak zel theih nan mipui ten min thlawp zel tur leh, a tul chuan thurawn pawh min pe zel turin kan inngen a ni,” a ti bawk.
ZPM General Headquarters General Secretary Dr C Lalrammawia pawhin thusawiin, “ZPM chuan all round development kan duh a, hmasawnna pawh a rual khai thei ang bera a kal theih nan kan hotuten ruahmanna tha tak an siam a. Hmasawnna hi vawi leh khata tihhlawhtlin vek theih a ni lo va, a tah tawlin hma kan la zel a ni. Sawrkar hnathawk indaih lohna te pawh ngun takin kan hotuten an ngaihtuah a, siam rem ngai ang ang te pawh siam rem zel a ni,” a ti a. “Rinawmna hi a pawimawh a, tunlai kan chhehvelah hnam leh hnam intibuai thawm kan hre thin. Unau kan indo chuan hnam a boral thin, chutiang chiah chuan hmun hrang hrang a zohnahthlakte pawh inlungrual taka kan khawsak hi a pawimawh. Hnam bil inlakhranna leh intihbikna hi a awm loh nan kan rilru siam tharin; hmasawnna kawng zawh tura inbuatsaih turin kan inchah nawn leh duh a ni,” a ti bawk.
Vawiina lawmluhte hi Silisury East VC member Purna Nath Chakma leh Marpara North Ex-VC Secretary Nihar Chakma bakah MNF leh Congress atangin mi thar 203 te niin ZPM thuchhuah chuan atarlang.
ZPM General Headquarters Vice President hi ZPM General Headquarters atangin Secretary Lalthazuali, Secretary Zoramsangzela leh H Lalremtluanga te bakah Dampa West Block hruaituten an tawiawm a ni.
[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: