Zirlai pawl leh Scholarship Board-ten zirlaite scholarship chungchang sawiho

Aizawl | July 10, 2025: Mizoram Scholarship Board hotute leh Zirlai pawlte chuan vawiin chhun dar 12 khan zirlaite scholarship chungchang an sawi hova, MSU aiawhin Treasurer Lalrampanmawia leh MZP aiawhin Secretary i/c Information C Lalrosanga te an tel.

MSB lam hian, Pre leh Post Matric Tribal Scholarship Single Nodal Account (SNA) account pangngai hmanga pek thin chu PM Vanbandhu Kalyan Yojana hnuaiah rawn dahin SNA SPARSH hmanga release tawh tur a nih avangin bank pangngai hman a theih tawh dawn lova, Reserve Bank of India (RBI) chauh hman theih a ni tawh dawn a. System thar hian Guwahati RBI-ah MSB-in account hawng tura tih niin, account hi hawn fel a nih hnuah Central Finance lamin an rawn bawhzui tur thu an sawi a.

he sawihonaa tarlan dan chuan, MSB in RBI account a neih hunah Public Financial Management System (PFMS) ah map a ni ang a, tichuan, Treasury-ah bill theh lutin State in Central Finance atangin SNA RBI account-ah a lut thei chauh ang.

Mizoram Scholarship Board chuan zirlaite scholarship chungchanga an harsatna hria in, scholarship hi zirlaiten an dawn vat theih nan a rang thei ang bera account pawh hawn tuma hma an lak mek zel thu an sawi bawk a ni. Guwahati-ah officer intirin a hmunah ngei bawhzui turin an inruahman a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]