India rama Sawrkar damdawi in ṭha tehna-ah PHC pathum tling thar

Aizawl | July 10, 2025: India rama sawrkar damdawi in ṭha bik tehnaah Mizoram chhunga Primary Health Centre pathum – Kanghmun PHC, Darlawn PHC, leh Buarpui PHC te an tel thar.

Health & Family Welfare Department hnuaia National Health Mission Mission Director Dr Lily Chhakchhuak chuan India rama sawrkar damdawi in ṭha bik tehna, National Quality Assurance Standards (NQAS)-ah Kanghmun PHC, Darlawn PHC, leh Buarpui PHC te chu an tling thar tih vawiin khan thuchhuahin a tarlang a, tehfung chi hrang hrang hmanga teh a nih hnuin 95.19%, 85.84%, leh 93.69% (a chunga PHC ziah dan indawtin) an hmu. Mizoram chhunga PHC zingah NQAS National Certificate hmu hi 22 an awm ta a ni.

Heti hian Mizoram chhunga Sawrkar damdawi in 32 te chu NQAS national certificate nei tawh an ni a. Tunah hian sawrkar damdawi in 23-in state level certificate nei tawhin national certificate result nghak mek 8 an awm bawk a ni.

Health Minister Lalrinpuii chuan, India rama damdawi in ṭha bik thlan chhuah zingah Mizorama damdawi in an awm belh zel chu Mizoram tan mellung pawimawh tak a nih thu leh damdawi in, district leh state-a thawktu zawng zawng te thawhrimna leh taimakna chhuanawm a tih thu sawiin, he’ng tehna te hi Sawrkar damdawi in pantu damlote chu a chhawr ṭangkai bertu tur an nih thu a sawi.