ṬKP Mission Vengthlang Pastor Bial-in thisen pe

Aizawl | July 5, 2025: Ṭhalai Kristian Pawl (ṬKP) Mission Vengthlang Pastor Bial chuan vawiin khan, Aizawl Area ṬKP Coordination Committee bultumin a mamawh tute tana thisen pek hun an buatsaih a, mi 167 kalin thisen unit 90 an pe.

Thisen hi Aizawl Civil Hospital Blood Bank atan an pe a, mipa 64 leh hmeichhia 26 in an pe thei a ni.

Thisen hi Aizawl Civil Hospital Blood Bank aṭangin thawktute'n BCM Capital Church Kohhran Hall-ah kalchilhin an la a, ṬKP Capital Church Unit ten hnehsawh takin an thleng a ni.

Bial huap thisen pek-ah hian ṬKP Mission Vengthlang Pastor Bial Senior Adviser Upa C Lalkima'n hunserh hmangin inchhiarna neih hnuah thisen pek chhunzawm a ni. Bial ṬKP member 150 kalin, Senior Adviser 2 bakah Aizawl Area ṬKP hruaitu 4 leh Aizawl Area ṬKP Media Cell member 2 an kal thei a, Aizawl Civil Hospital Blood Bank aṭangin thawktu 9 an kal bawk.

ṬKP Mission Vengthlang Pastor Bial chhungah hian ṬKP unit nga - ṬKP Capital Church Unit, ṬKP Hlimen Unit, ṬKP Maubawk Unit, ṬKP Shalom Unit leh ṬKP Tlangnuam Unit te an awm mek a ni.