THIHNA KOTLANGA DING MEK I ṬHIAN I ṬANPUI DAN TUR

_Thilmak I Beisei Laiin_

- Rick Warren

- July 22, 2025

 

“Nimahsela, aw Lalpa, ka ring chia: ‘Ka Pathian i ni,’ ka ti a. Ka hunte chu i kutah a awm a .” Sam 31:14-15

Mi zawng zawngin an paltlang tur thil pahnih a awm a: Pianni leh thihni hi a ni. Khawiah pawh awm mah la, thihna hi chu pumpelh theih a ni lo, zaa za a ni. Thi vek tur kan ni a nih chu. Bible chuan, “Eng mi nge thih ni hmel hmu lova nung a, Seol kut atanga nunna chhanhim tur chu?” a ti a ni. Sam 89:48

I thian emaw in chhungte zing ami emaw thihna kotlanga ding mek awmsela, engtin nge i tanpui ang? Anmahni tanpui tur chuan, an dinhmun leh an harsatnate i hriatthiampui angai a ni.

Anmahnia a thawhdan chu a inanglo theuh ang, nimahsela thi mai tura an inbuatsaihdan chu a inang deuh thup a ni. Lusunnaah hian kawng nga an paltlang thin an ti a. chungte chu ‘On Death and Dying’ tih lehkhabu kum 1969-a Elisabeth Kubler-Ross tihchhuah atangin an sawi a ni. Sam bu-ah pawh hetiang lam hawi hi hmuhtur a awm a ni.

Heng kawng nga te hi i hriatthiam chuan - i thian emaw i chhungte emaw thihna kotlanga dak mekte puihna kawngah i tangkai thei ang.

*Kawng 1: Hnawlna*

Mi tuemaw chu a thihtur thu hriattir ta sela, a pawm lo vang. Chutianga hnawltute chuan, “Ka chungah a thleng lo vang” an ti ang. An hnawlna chhan chu an hlauh vang a ni. Sam 55:4 ah chuan, “Ka kawchhungah hian ka thinlung a na em em a: Thih rapthlaknate chuan mi delh a.”

*Kawng 2: Thinurna*

Chungmi te chu Pathian chungah te, daktawr chungah te, an chhungte chungah leh anmahni chungah ngei pawh an thinur thin a ni. Hetiang hian an inhrosa thin, “Engvangin nge ka chungah a thlen bik? A dik bik lo!” Sam 39 ah chuan, “Ka kawchhungah hian ka thinlung a sa huam huam a; ka ngaihtuah ka ngaihtuah chuan mei chu a alh chhuak a; Tin, ka lei hian thu ka sawi ta a: ‘Lalpa ka tawpna tur leh, ka dam chin tur chu engtin nge ni tih, mi hriattir la; ka derdepzia hi mi hriattir ang che.” Sam 39:3-4

*Kawng 3: Intiamna*

Hetiang hian an sawi duh chawk, “Lalpa, reilote tal minla da tir chuan ka tiam a che …” Pathian hnena thu tiama dam zel an tum thin. Nimahsela Bible chuan, “Mi thlarau chelh theihna leh thih ni chunga thuneihna nei tumah an awm lo” a ti. Thuhriltu 8:8. Sam 49:8-9 ah chuan, “An nun tlanna tur chuan thil nasa tak sen tur a ni a, kumkhua pawha atina tin, loh mai tur a ni: A dam reng fo va, tawihna a hmuh lohna tur chuan.”

*Kawng 4: Nguina*

Hetiang dinhmuna an din tawh chuan an ngui nghuai a, tawp mai an duh tawh thin. Hetiang ang hian an awm thin. “Rethei leh pachhe tak ka ni a, ka thinlung hi ka kawchhungah hliamin a awm bawk si. Hlim ral lam tung tawh ang hian ka ral a: Khaukhuap ang hian len bovin ka awm a.” Sam 109:22-23

*Kawng 5: Pawmna*

Hetiang ang dinhmuna an din tawj chuan hetiang hian an ngaihtuah tan thin, “Ka tan chuan ka dinhmun hi ka pawm mai angai a, ka inbuatsaih a tul ta. Engkim a tha vek ang. Engpawh lo thleng se ka inpeih e,” tiin. Sam 31:14-15 ah chuan, “Nimahsela, aw Lalpa, ka ring chia: ‘Ka Pathian i ni,’ ka ti a. Ka hunte chu i kutah a awm a …”

A chunga mi khi mi zawng zawngin an paltlang vek lo - a indawt dan diak diakin an paltlang kher lo bawk. Nimahsela heng hi i hriatthiam chuan i laina emaw chu hetiang ang dinhmunah ding sela i hriatthiampui kuar tawh ang. Chutiang ang mi chu i tawn fuh hlauh chuan an mamawh hun lai takah anmahni tanpui turin an kiangah i awm thei dawn a ni.

Ngaihtuah zui atan

* A chunga kan sawi kawng nga ah te khian paltlang tawh i nei em? (Eng lusunna nge i hmachhawn tawh, I laina hnai i sunna pawh a ni maithei.) I lusunnaah chuan i thianten engtin nge an tanpui che?

* Tunah hian thihna hmachhawn mek an awm em? Engtin nge chu mi chu i tanpui theih ang?

* Sam 31:14-15 chuan, “Nimahsela, aw Lalpa, ka ring chia: ‘Ka Pathian i ni,’ ka ti a. Ka hunte chu i kutah a awm a …” Vawiinah hian i nunah a eng ber kha nge Pathian hnena i hlan ngai awm? 

*[Lettu: Sangpuia]*