THIAN DIK CHUAN A THIANTE A TAWNGTAIPUI THIN

  _Thilmak I Beisei Laiin_

  

- Rick Warren 

- July 15, 2025

 

“Chutichuan zahngaihna kan hmuh theihna tur leh, puih kan ngaih huna tanpuina khawngaihna kan hmuh theihna turin, khawngaihna lalthutphah chu huai takin i hnaih ang u.” Hebrai 4:16

 

Nupa inthenna a lo awm hian nasa takin an rum thin. Chuvang chuan chutiang harsatna lo paltlang tawh thian neihte a hlu em em a ni. Chung mite kan puih theihna tha bere chu tawngtaina hi a ni.

 

Inthenna hmachhawn mekte tana i tawngtai dan tur kawng thumin ilo en ang.

 

*Pathian awmpuina an chang a ni tih an hriat theih nan.*

Miin inthenna a paltlang chuan khawhar takin an awm thin a ni. Hetiang hian tawngtai rawh, “Lalpa, kan thianten anmahni pui turin nang i awm a ni tih hriattir ang che. Hla taka awm i ni lo tih hriattir la. Hnaite a awm i nih zia te. A tak ngeia i awm thu leh ka thian pawh amah chauhin a awmlo a ni tih hriattir ang che.”

 

Bible chuan, “Lalpa chuan thinlung lungchhiate chu a hnaih thin a, rilrua inchhir apiangte chu a chhandam thin” Sam 34:18. Rilru kehsawmte chu Lalpan a hnaih thin.

 

*Pathian khawngaihna an chan theih nan.* An harsatna an paltlang theihna turin Pathian khawngaihna an mamawh a ni. Khawngaihna chuan a chelh thin a. Tawpsan hial an duh lai pawhin chakna a pe thin. Engmah pek tur an neih loh pawhin Pathian khawngaihna pek tur ala awm a ni. Chuvang chuan tawngtai la,”Lalpa, i khawngaihna dawng turin tanpui rawh.”

 

“Chutichuan zahngaihna kan hmuh theihna tur leh, puih kan ngaih huna tanpuina khawngaihna kan hmuh theihna turin, khawngaihna lalthutphah chu huai takin i hnaih ang u.” Hebrai 4:16

 

*An harsatna chu Pathian chinfeltir nachang an hriat theih nan.* Hetiang hian tawngtai la, “Lalpa, an rilru a awm zawng zawng, an rilru hahna leh an rilrua an pai zawng zawngte an puan vek theihna turin tanpui la. An natna zawng zawngte i hnena tawngkaa an sawi ngam theihna turin tunah hian nangin pui ang che.”

 

Tawngtaia tanpuina chuan engtiangin nge awmzia a neih? Anmahni aiawha tawngtai ringawt i ni lo va. Pathian hmaah an inbunruah theihna tur leh an rilru diktak an sawi ngam theihna turin i fuih a ni.

 

Bible chuan, “Ka awin Lalpa chu ka au va; ka awin Lalpa hnenah khawngaihna ka dil thin.” Sam 142:1

 

Naupangin a pa hnena tap chunga a dil ang hi a ni: “Ka pa! Min pui rawh! Min puih ka ngai!” Hmangaihna nei pa an nih phawt chuan chutianga tap chu an hnar lo vang. An rilru ang chuan an chhang let thin - chutiang chiah chu Pathian chetdan tur pawh a ni. I thianin tap chunga a dil hun a nghak mek a ni.

 

Ngaihtuah zui atan

 

* I thian rilru na tan rinawm taka tawngtai turin i inpe tawh em? Ilo ti tawh anih chuan engtin nge Pathian hnathawh i hmuh?

 

* Ka rilrua awm chu a tha lo deuh pawh nise Pathianin a ngaihthlak duh tho i ring em? Engtiangin nge rilru na chu thawidamin a awm ang?

 

* Tap chunga a hnena tawngtaina chu Pathianin a chhan che i ring em?

 

*[Lettu: Sangpuia]*