PM Shri MICE atangin 'Akhil Bhartiya Shiksha Samagam' chhim

Aizawl | July 29, 2025: Vawiin July ni 29, Thawhlehni chawhma khan Union Education Minister Dharmendra Pradhan hovin Bharat Mandapam, New Delhi-ah New Education Policy 2020 kum 5 tlin pualin 'Akhil Bhartiya Shiksha Samagam (All India Education Conference) buatsaih a ni a. Mizorama district tina Prime Minister School for Rising India (PM Shri) tha thlan chhuah sikulte'n an sikul atangin online hmangin an chhim.

Mizoram atanga Akhil Bhartiya Shiksha Samagam chhimtute chu - Mizoram Institute of Comprehensive Education (MICE), Aizawl Dist; Buangpui Primary School, Serchhip Dist; Rabung Primary school, Khawzawl Dist; Kolasib Model Primary School, Kolasib Dist; EMRS Chawngte, Lawngtlai Dist; Model Primary School, Lunglei Electric Veng, Lunglei Dist; Kawrthah Primary School, Mamit Dist; Hnahthial PS-I, Hnahthial Dist; New Light Primary School, Siaha District; Ngopa PS-II, Saitual Dist leh, Zokhawthar P/S, Champhai Dist te an ni.

MICE, Aizawlah chuan Principal Lalrinkima leh zirtirtute bakah, Tuikual North Local Council member-te leh chanchinbumite'n an chhim a; Lalrinkima chuan, MICE chu hun rei lo tê PM Shri an la kalpui chauh chungin Aizawl district-a Best PM Shri School-a thlan an nih thu a sawi.

Samagam-ah hian Union Education Minister Dharmendra Pradhan chuan thu a sawi a; Mizoram bakah, Goa leh Tripura state-te chu kum 15 chin chung lam ziak leh chhiar thiam vek, fully literate state-a puan tawh an nih thu sawiin, a lawmpui thu a sawi. State dangte pawh hmasawn zel turin a fuih bawk.

PM Shri hmalakna hnuaiah hian India ram pumah sikul 13,076 thlan niin, tihchangtlun chhoh mek a ni a; Mizoramah pawh music instructor, language instructor leh sports instructor te lak thar niin, zirna kalpui mek a ni.