NH 306 & 06 kawng dunga lirthei khalhtu tangkhangte ei tur pe dawn

Kolasib | July 26, 2025: Tukin zingkarah khan Kolasib-a cham mek FCS&CA Minister B Lalchhanzova kaihhruaina hnuaiah NH-06 kawng dunga lirthei khalhtu tangkhangte ei tur pek dan tur chungchang Kolasib DC Circuit House-ah relho a ni. Minister hi Bialtu MLA leh Deputy Speaker Lalfamkima chuan thutpuiin, Kolasib DC Robert C Lalhmangaiha leh DC Office-a officers te, Police lam hotu te leh DCSO Office lama thawktu ten an tawiawm a ni.

He Meeting-ah hian NH-06 (Rengte Tlangsang) leh Kawnpui leh Khamrang kawng dunga lirthei tangkhangte chungchang ngun taka ngaihtuah a ni a.A khalhtu leh motor enkawltute ei leh in tur ngaihtuahsak a pawimawh thu rel a ni. Supply Minister leh Kolasib Bialtu MLA te hmalaknain DM&R Department leh FCS&CA Department hotuten buhfai sem tur leh ei tur leina tur pawisa fai an ngaihtuah fel nghal a ni a.

DC Kolasib kaihhruaina hnuaiah hemi ni vek chawhnu dar 12:30-a emergency working committee neih chuan he hmalakna tur bawhzuia thukhawmin thurel an nei nghal a. Ei leh in tur ngaihtuaha, a mawmawhtute hnena sem hna hi Kolasib atanga hmar lama chuan KDTOA & MTDA leh an phungbawmte kutah dah felin, chhim lam chu Kolasib Sub-Hqrs. YMA kutah a dah a ni. A tum khata ni turin lirthei khalhtute hi buhfai, dal, tel, purunsen leh tui thianghlim pek ni se ti-a rel a ni. Hei hi ni 27.07.2025 chawh hnu lam atang sem tan tura tih a ni. Working committee-ah hian DC bakah, Addl. DC, Addl. SP, DCSO staffs, DI&PRO, Kolasib Sub-Hqrs. YMA hruaitute, KDTOA & MTDA hruaitute, DO (DEOC) leh mi pawimawh dangte an tel a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]