Mizoram State 8 Ball Pool Championship 2025 - 2026 khelh zawh takah Lalrina Renthlei a champ!

# Mizoram State 8 Ball Pool Championship 2025 - 2026 khelh zawh takah Lalrina Renthlei a champ!

# August 6 aṭangin Inter College 9 Ball Pool Championship

Aizawl | July 26, 2025: Mizoram Snooker & Billiards Association (MSBA) buatsaihin July 21 aṭanga khelh tan Mizoram State 8 Ball Pool Championship 2025 - 2026 chu zanin (July 26, 2025) khan a hmawr bawk a ni a, Lalrina Renthlei a champion.

Mizoram State 8 Ball Pool Championship 2025 - 2026 final hi tlai dar 5 khan khelh niin, Lalrina Renthlei leh PB Liansangzuala te an inhmachhawn a, race to 8 (frame riat chak hmasa sa chak) in an khel a, inkhelh hmuhnawm tak an entir a, Lalrina hi 8 - 0 in a chak a, champion a ni ta a ni.

Mizoram State 8 Ball Pool Championship 2025 - 2026 quarter finals hi nimin tlai khan khelh a ni a, table pahnih-ah a ruala khelh niin, dar 5-ah Lalrina Renthlei vs Lalchhandama leh Peter Lalrintluanga vs Lalbiakdika te an khel a, Lalrina hian 6 - 1 a Lalchhandama hnehin semi final a lut a, Peter Lalrintluanga'n 6 - 2 in Lalbiakdika a hneha semi final a lut thung.

Dar 6-ah PB Liansangzuala vs Samson Lalnuntluanga leh Lalbiaksanga vs R Lalṭhazuala te an inkhel a, PB Liansangzuala 6 - 1 leh R Lalṭhazuala 6 - 2 a an khelhpuite hnehin semi final an lut ve ve bawk.

Semi final match hmasa zawk hi zan dar 7-ah tan niin, Lalrina Renthlei leh Peter Lalrintluanga te an inhmachhawn a, 7 - 3 in Lalrina a chak a, final a lut a ni. Match hnihna-ah PB Liansangzuala leh R Lalṭhazuala te inhmachhawn ve lehin, an inhneh tawk hle a, inkhel hmuhnawm tak an entir hnuin, 7 - 5 in PB-a a chak a, final a lut ta a ni.

Mizoram Snooker & Billiards Association (MSBA) Hall, Hawla Indoor Stadium-a khelh Mizoram State 8 Ball Pool Championship 2025 - 2026-ah hian Mizoram chhung hmun hrang hrang aṭangin infiammi mi 100 chuang an tel a, knockout-a khelh niin, zanin khan a hmawr bawk a ni ta a ni.

Tun ṭum Mizoram State 8 Ball Pool Championship 2025 - 2026 hi 2025 - 2026 season-a MSBA-in championship vawi hnih a buatsaihna a ni a. Hemi hma hian, Mizoram 10 Ball Pool Championship a lo buatsaih tawh a, Season hi sorkar sum kum (April - March) zula kal ve a ni. Heng bakah hian, Novice 9 Ball Pool Tournament tum hnih a buatsaih tawh bawk a ni.

MSBA hian Mizo Zirlai Pawl (MZP) nen ṭangdunin August 6 - 8 chhung hian, Inter College 9 Ball Pool Championship 2025 an buatsaih dawn a, heta tel turte chu July 28 - August 5 chhung hian a thlawna khelhna hun an hawnsak dawn. MZP & MSBA Inter College 9 Ball Pool Championship 2025 atan hian zanin thleng khan zirna in pasarih an inziaklut tawh a ni.

Heng championship te hi MSBA Hall, Hawla Indoor Stadium-ah khelh a ni dawn a, Youtube lamah Explore Mizoram channel-ah live tura ruahman a ni.