NH 06 hi NHIDCL-in an enkawl chin chu a ziaawm deuha ngaih theih a ni, Mizoram PWD-in a enkawl lai bik km 40 chin erawh a tha lo hle!

Aizawl | July 5, 2025: BJP Mizoram State President Dr K Beichhua-a'n vawiin khan NH 06 Sairang - Khamrang kawng chhia tlawhin, theihtawp chhuaha hma lo la tur leh harsatna an nei a nih chuan an hnena thlen turin NHIDCL hotute a chah.

Mizoram chaklakna kawng pawimawh tak hi a chhe hle niin Dr K Beichhua chuan a sawi a. Karleh Thawhtanni - July ni 7, 2025-ah Mizoram sawrkar leh NHIDCL-in he kawng hi enfiah an tum tih sawiin, chumi hnuah chuan NHIDCL kuta hlan tum a nih thu a sawi.

BJP Mizoram State President chuan vawiin tlai lamah kawng chhiat zualna lai leh motor kal hleitheihlohna-ah te khawl dah nghal turin NHIDCL hotute chu thurawn a pe a. NHIDCL hotute pawhin an lo tih nghal tur thu BJP Mizoram State President chu an hrilh nghal niin BJP thuchhuah chuan a tarlang.

Dr K Beichhua chuan NH 06 hi NHIDCL-in an enkawl chin chu a ziaawm deuha ngaih theih a nih thu sawiin, Mizoram PWD-in a enkawl lai bik km 40 chin erawh a tha lo hle niin a sawi a. Sawrkar tihmualpho emaw intihlar tum vang emaw-a he kawng hi tlawh leh enfiah an nih loh thu sawiin, "kan kawng pawimawh ber chhiat dan leh a siamthat kawnga hmalak ve theihna kan neih beiseia tlawh kan ni" a ti bawk.

"Kawnpui leh Khamrang kawng chu NHIDCL te nen inbiakna kan neih hnuah vawiin khan a hmunah kan zu kal a. Kawng dinhmun en in a lungchhiatthlak hle mai. Amaherawhchu, kan dilna te ngaipawimawhin NHIDCL hian Monday aṭanga hnathawk nghal turin hnathawh hmanrua te an chhawp nghal a, a lawmawm hle mai. He kawng hi NHIDCL te hian KM 77 changin, Mizoram PWD te hian KM 40 chauh an chang thung a. Kan dilna angin, Monday aṭang chuan NHIDCL hian KM 40 pawh hi a kutah a dah dawn ani. KM 40 chauh kawng pawh kan siam hleitheilo hi chu a manganthlak takzet ani. BJP Mizoram chuan kawng ṭha kan neih theih nan hma kan la zel dawn a, State sawrkar pawhin a ṭul chuan BJP hi inthlahrunglo in minlo pun zel se, Mizoram tan kan awm reng dawn a ni tih ka sawi duh bawk e." a ti.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]