MZP Sub-Hqrs Cherhlun-in Mizo Zirlai ti ṭha chawimawina hun hmang

Cherhlun | July 8, 2025: Vawiin chawhnu dar 1 khan Mizo Zirlai Pawl Sub-Hqrs: Cherhlun chuan an huam chhunga Mizo Zirlai ti ṭha chawimawina hun hmangin, MZP Gen-Hqrs, Aizawl General Secretary Chinkhanmanga Thomte chuan khuallian niin a hmanpui.

Khuallian MZP Gen-Hqrs, Aizawl General Secretary Chinkhanmanga Thomte, chuan thusawiin, Zirlai chawimawite chu thinglung taka MZP-in a lawmpui thu sawiin, chawimawi nawn tlak turin nun fimkhur turin leh ṭang zual sauh sauh turin a fuih a. Kumina chawimawinaa lang lote pawh, nakkum lama chawimawi tur zinga tel ngei turin ṭan la turin a sawm a ni. "Zirlaite hian Social Media kan khawih nasa tawh em em a, Mizo zirlaite hian vawiin atangin lehkha bu chhiar tam i tum ang u," tiin zirlaite chu lehkhabu chhiar tam turin a leh Social Media hman kawngah fimkhur turin a chah thar bawk a. Mizo Zirlaite chu hnam dang nupui pasal nei lo turin a chah a, mahni Mizo pui ngei kawppuia nei turin a chah thar leh bawk a ni.

MZP Hqrs Hnahthial President Jimmy Lalrosanga'n thusawiin Zirlaite chu lehkha zirna kawngah hlawhchham tum lo a, hlawhtlin tuma zir tlat turin leh tumruhna te nei thar turin a chah a. Nu leh pate leh Zirtirtute hauh hlauh vang ringawt ni loin, tumna tak tak nei chungin lehkha zir turin a fuih a. MZP Hqrs Hnahthial chuan, Hnahthial District chhunga zirlai, Civil Service Aspirant-te sponsor tumin ruahmanna kan siam ṭhin a, tumna tak tak nei Combined Competitive Examination hmachhawn tum chu engtik lai pawhin sponsor MZP-in a chak reng thu a sawi bawk a ni.

Mizo Zirlai sum leh pai harsatna avanga zirzawmna tur nei lo chu MZP Hqrs Hnahthialin an zirna senso tumsak an inhuam reng thu a sawi a ni.

Cherhlun VC Member Jacob Lalrodinga'n thu sawiin, Zirtirtute fuih thara neiin, zirlaite ṭha taka an pass theih nan Zirtirtu te zirtîrna a pawimawh zia sawiin, Zirlai kalkhawm te chu an Zirtirtute thu awih a, tumruhna leh taimakna nen lehkha zir ṭang ṭang turin leh, pass satliah mai lo a, Mizoram puma lang pha tura zir turin a fuih a, ram leh khawtlang tana chhawr tlak ni turin, zirlaite a sawm a ni.

MZP Sub-Hqrs Cherhlun Secretary Vanlalngheta'n Report tawi pein, kumina MZP Sub-Hqrs Cherhlun-in Zirlai ti ṭha chawimawina a neihte hi First Division-a pass chin niin, HSLC-ah mi 14 leh HSSLC-ah 1, an vaiin mi 15 te chawimawina thuziak an hlan a ni.

He hun hi MZP Sub-Hqrs Cherhlun Assistant Secretary Peter Lalremruata'n kaihruaiin, PCI Pastor H. Lalruatkima'n hunserh a, MZP Sub-Hqrs Cherhlun Vice-President B Lalhmunmawia'n lawmthu sawina hun an hmang bawk a ni.