MSU-in MZU hnuaia UG topper-te lawmpui; teirei peihna chuan a tawpah hlawhtlinna a chantir ṭhin

Aizawl | July 9, 2025: Vawiin chawhma dar 11:00 khan MSU, General Headquarters chuan Under Graduate Mizo Topper mi-24 te lawmpuina Vanapa Hall ah an hmang.

UG Topper Lawmpuina programme ah hian Minister Lalthansanga'n khuallian niin a hmanpui a. Mizoram Cooperative Apex Bank Chairman Lalnunsanga chu khualzahawm a ni.

UG topper-te lawmpuina hi MSU General Secretary Zodinsanga'n a kaihruai a, MSU Asst.General Secretary Lalruatpuia'n Report a pe.

Khuallian Lalthansanga chuan thusawiin kan tunlai khawvel chu Global Village anga kan inhlawm khawm tawh avangin, kan changkang tawh a. Ram changkang zawk te tihdan pawh entawn a awlsam tawh thu a sawi.

Minister Chatea chuan, mahni hnam nunphung kalsan lo turin zirlaite a fuih a. Tin, hlawhtling tak tak chang tur chuan teirei peih a pawimawh, a ti a. Minister dinhmun thleng tur hian kum 1993 aṭanga a beih tawh thu sawiin, teirei peihna chuan a tawpah hlawhtlinna a chantir ṭhin, a ti.

Khualzahawm Lalnunsanga chuan MSU in Zirlaite fuihphurna atan leh, tihhmasawnna atana Lawmpuina hun an buatsaih chu ṭha atih thu a sawi a. Kan ram kan hnam tana rotling ṭhalai ni zawm zel turin Zirlaite chu a fuih a ni.

MSU President B Lalkhawngaihzuala chuan ram leh hnam hmangaih turin Zirlaite chu a fuih a, ram leh hnam hmangaih lo Officer leh Politician te chu ram leh hnam tan an hnawksak thu a sawi a. Aia upa te zahthiam a, kan zirthiamna in zonun zemawi hliahkhuh lo se, nakin thlenga lawmpui zel tlak mi hlawhtling a inchherchhuak turin Zirlai passed lawmpuite a fuih bawk a ni.

Pass lawmpui zawng zawngte hi MSU chuan Pawisa fai leh Citation a hlan vek a, MSU Senior Adviser Lalhmachhuana Zofa hnenah Honorary Doctoral Degree a dawn lawmpuina thuziak hlan a ni bawk.