MNF party hi sawrkar sum enkawl danah kawng an lo bo fo thin nge, dan leh hrai te an lo mausam thin zawk, tih hi kan zawt a ni

Aizawl | July 30, 2025: ZPM General Headquarters chuan vawiin khan thuchhuah siamin, "MNF party hi sawrkar sum enkawl danah kawng an lo bo fo thin nge, dan leh hrai te an lo mausam thin zawk, tih hi kan zawt a ni," an ti.

ZPM thuchhuah:

Tun hnaia Fisheries Department pawisa sanction Cheng Nuai 1,000 chungchangah hian thu dik tawk lo vawrh darh mek a ni a. Thil awm dan dik tak chu hetiang hi a ni:-

1. PMMSY Scheme hi kum 2020 atanga tan niin kum 2025-a tawp tur a ni. He scheme hnuaia hamthatna awmte hi sangha khawitute hnena pek thin a ni a, sangha khawituten tanpuina pawisa an dawn tur chu an bank account-ah thun thin a ni.

2. He pawisa sanction Cheng Nuai 1000 hi PMMSY Scheme hnuaia sangha dil siam leh sangha khawi kaihhnawih hrang hrang atana hman turin ‘Ministry of Fisheries, Animal Husbandry & Dairying’ lehkha No.j-117012/16/2020-Fy(E-17215) Dt.25.04.2025 hmanga dawn a ni. Allocation hi Mizoram Sawrkar atanga hmuh tawh niin, expenditure sanction turin a rang thei ang bera bawh zui nghal a ni a. Sanction hi Finance Department atanga hmuh vat beisei leh hma lak mek a ni.

3. Cheng Nuai 1000 hi hman theih tura Sanction Approval hmuh a nih veleh pawisa hmanna tura ruahman sa, component hrang hrang atana bill siam a ni ang a, Direct Benefit Transfer (DBT)-in pawisa hi SNA SPARSH kal tlangin Reserve Bank of India (RB)-in pawisa dawngtu turte bank account theuhah direct-in a thun ang. Pawisa hi Mizoram Sorkarin a thu chauhin a dawng ve a ni.

4. He pawisa hmanna tur hi fel taka ruahman sa vek tawh a ni a. A hman dan tur pawh Mizoram Sorkarin a approve sa vek a ni. A sum erawh beneficiary te hnena Direct Benefit Transfer (DBT)-a pek tur a ni.

5. PMMSY Scheme hnuaia Central-in Project a approve tawh china pawisa a la rawn pek leh tur, Cheng Nuai 700 nia sawi pawh hi hetiang zat ni lovin, Cheng Nuai 245.59 hi dawn leh tur la awm chu a ni.

Hemi chungchangah hian MNF Party-in July ni 25, 2025 khan thu chhuah an siam a, he an thuchhuah hi an ngaihtuah chiang lo hle niin a lang a. MNF party hi sawrkar sum enkawl danah kawng an lo bo fo thin nge, dan leh hrai te an lo mausam thin zawk, tih kan zawt a ni. Budget leh Project kalphung hre chiang lova inbeih leh, thu dik tawk lo hmanga inchirhtheh hi sim tawh se kan ti a. Hriat chian duh an neihte hrilhfiah turin ZPM kaihhruai Mipui Sawrkar hi a inpeih reng a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]